ಒಲವೇ,
ನೋವು ಹರಿದಿತ್ತು ಕಾಯವನ್ನು ನೂರಾಗಿ ಚೂರಾಗಿ
ಕುಸಿದು ಕುಳಿತಿದ್ದೆ ಮರೆತು ನನ್ನೊಳಿಗಿರುವ ನಿನ್ನನು
ಎಚ್ಚರಿಸಿತು ಆ ಹಾಡು ಮರೆತಿರುವ ನನ್ನನ್ನು
ಹೃದಯ ಗೋಕುಲ ಮಾಧವನ ಮುರಳಿ ನಿನಾದವಲ್ಲೀಗ 
ಮನದಲಿ ರಾಧಾ ಕೃಷ್ಣರ ಪ್ರೇಮಸಲ್ಲಾಪ ನಿತ್ಯವೀಗ!

ಒಲವೇ,

ಅಲ್ಲೊಂದು ಲೋಕವಿದೆ;

ತಪ್ಪು ಒಪ್ಪುಗಳ ಗಡಿಯಾಚೆ

ನಮ್ಮಿಬ್ಬರ ಭೇಟಿ ಅಲ್ಲಿಯ ತೋಟದಲ್ಲಿ;

ಅನಿಮಿಷರು ನಾವಲ್ಲಿ!




-ಪ್ರೇರಣೆ ರೂಮಿ

ಒಲವು ಹಚ್ಚಿದ ಹಣತೆ ಮಂಕಾಗಿದೆ..

ಒಲವೇ,

ಅಂದು ನೀ ನನ್ನದೆಯಲಿ ಹಚ್ಚಿದ ಹಣತೆ ಬಿರುಗಾಳಿಗೆ ಬೆದರಿ ಮಂಕಾಗಿತ್ತು..

ಮೊರೆಯನಾಲಿಸಿ ಅಡ್ಡ ಹಿಡಿದ ಸ್ನೇಹ ಹಸ್ತಗಳ ಸ್ಥೈರ್ಯಕೆ ಬೆದರಿ ಹಿಮ್ಮೆಟಿತು ಗಾಳಿ..

ಇದೀಗ  ಪ್ರಜ್ವಲಿಸುತಿದೆ ಮತ್ತಷ್ಟು ಉದ್ದಗಲಕೂ ಹರಡಿ ಬೆಳಕು ನನ್ನೊಳಗೆ!

ಬೆಳಗುವ ಪುಟ್ಟ ಕೊಡೆ!

ಉಳಿದಿಲ್ಲವೀಗ ಏನೂ ಅಲ್ಲಿ!

ಅವನ, ಇವನ, ಅವಳ, ಇವಳ, ನಿನ್ನ

ಆಪಾದನೆಗಳ ಪರ್ವತ ಮನದಂಗಳದಲ್ಲಿ

ಹಿಂದಿನ ನೋವೆಲ್ಲಾ ಮುಗಿಲಾಗಿ

ಮತ್ತೆ ತೇಲಿ ಬಂತೇ

ತಣ್ಣನೆಯ ನಿಟ್ಟುಸಿರು ಹೊಮ್ಮಿತ್ತು

ತಾಗಿದೇ ಕ್ಷಣ ಮೇಘಸ್ಫೋಟ

ಪಕ್ಷವೊಂದು ಪೂರಾ ಎಡಬಿಡದೆ

ಸುರಿಯಿತಲ್ಲಿ ಧಾರಾಕಾರ ವರ್ಷ

ನೋವೂ-ನಲಿವೂ ಕೊಚ್ಚಿಹೋಯಿತು

ಒಲವಿನ ಗರ್ಭಗುಡಿ ಪೊತ್ತ

ಜರ್ಜರಿತ ಕಾಯದ ಹೊರತು

ಉಳಿದಿಲ್ಲವೀಗ ಏನೂ ಅಲ್ಲಿ!

#ಅನುಭವ!

||ಮನದೊಳಗಾದರದಿಂದ ಬರಮಾಡಿಕೊಂಬವರ ತಪ್ಪುಗಳು ಸಹನೀಯ||

||ಮನದಿಂದತ್ತ ದಬ್ಬಿದವರ ಒಪ್ಪುಗಳೂ ಅಸಹನೀಯ||

ಮುಳ್ಳುಗಳ ಮಧ್ಯದಲ್ಲಿ ಅರಳಿ ಪರಿಮಳ ಹರಡುವ ಗುಲಾಬಿಯ ತಾಳ್ಮೆ ನನ್ನಲ್ಲೂ ಬೆಳೆಯಲಿ ದೇವಾ!

ನನ್ನೊಳಗಿನಿಂದ ಮೂಡಿದ ಕಾವ್ಯವೆಲ್ಲವೂ ಧನ್ಯ!

ಏಕೆನ್ನುವಿರಾ, ಅವೆಲ್ಲವೂ ನನ್ನ ಬಡಬಡಿಕೆಗಳಾಗಿದ್ದವೆನೋ ನಿಜ,

ಆದರೆ ಇದೀಗ ಒಲವಿನ ಸಾಗರಲ್ಲಿ ಮಿಂದು ಪುನೀತವಾಗಿವೆ ಎಂಬುದು ಅಷ್ಟೇ ನಿಜ!

-ರೂಮಿ ಪ್ರೇರಣೆ

“ಕುಂಚಗಳನ್ನು ಮರಳಿಸುವಿಯಾ?”

ದೈನ್ಯತೆಯ ನುಡಿ!

“ಸಾಧ್ಯವಿಲ್ಲ”

ಬಿರುನುಡಿ!

“ಹೋಗಲಿ, ನನ್ನ ಕೆಮರಾ ಕೊಡುವಿಯಾ?”

“ನಿನ್ನ ಛಾಯಾಗ್ರಹಣದ ದಿನಗಳು ಮುಗಿದವು ಹೆಣ್ಣೇ!”

ಬಿರುನುಡಿ ಬಾಣದಂತೆ ಬಂದಿತು!

“ಬರಹವನ್ನೂ ಕಿತ್ತುಕೊಳ್ಳುವಿಯಾ?”

“.... “

ಮೌನವನ್ನು ಸೀಳುವಂತೆ ಕೇಳಿಸಿತು ಬಿಕ್ಕುತ್ತಿರುವ ಶಬ್ದ!

ತಟ್ಟನೆ ಎಚ್ಚರವಾಯಿತು. ಆ ಬಿಕ್ಕುತ್ತಿರುವ ಶಬ್ದ ನನ್ನೊಳಗಿನಿಂದಲೇ ಬರುತ್ತಿದೆ.

ಅಬ್ಬಾ! ಎಂಥ ಕನಸು!

ಬರೆಯುತ್ತಲೇ ಇದ್ದೇನೆ...

ಆದರೂ ಹೇಳಬೇಕಾದುದನ್ನೇ ಬರೆಯಲಾಗಲಿಲ್ಲವೇಕೆ?

-

“ರಂಗನಾಯಕ! ರಾಜೀವಲೋಚನ! ರಮಣನೇ! ಬೆಳಗಾಯಿತು, ಏಳು”

ಹಾಡುತ್ತಾ ದಧಿಯ ಕಡೆವ ಯಶೋಧೆಯಾಗುವ ಬಯಕೆ!

ಆ ಮಿಂಚುವ ನೀಳ ಕೇಶರಾಶಿಯನ್ನು ಕಟ್ಟಿ, ನವಿಲುಗರಿಯ ಬಿಗಿದು, ಘಮಘಮಿಸುವ ತುಳಸೀ ಮಾಲೆ ಕೊರಳಿಗೆ ಹಾಕಿ, ಪೀತ ರಂಗಿನ ಪೀತಾಂಬರವನ್ನು ಉಡಿಸಿ, ಕೊಳಲನ್ನು ಉಡಿಗೆ ಬಿಗಿದು, ಬುತ್ತಿಯನ್ನೀವ ಯಶೋಧೆಯಾಗುವ ಬಯಕೆ!

ಹ್ಮೂಂ, ಇಡೇರಲಸಾಧ್ಯವಾದ ಬಯಕೆಗಳನ್ನೆಲ್ಲಾ ಮತ್ತೆ ಹೃದಯದ ಮೂಲೆಗೆಸೆದು ನಿತ್ಯ ಕರ್ಮಕೆ ಮರಳುವ ಮುಂಜಾನೆ!

“ನಾನೇ ನಿನ್ನ ಮನವ ಬೆಳಗುವ ದಿನಕರ

ಪಾದದಿಂದ ನೆತ್ತಿಯವರೆಗೂ ಅಲೆಯುಕ್ಕಿಸಿ

ಮುತ್ತಿನ ಮತ್ತು ಚೆಲ್ಲುವ ಸಾಗರ

ನಿನ್ನೊಳಗಿರುವ ನನ್ನಾತ್ಮವೇ ಭೋಗದರಮನೆ

ಹೊರಗಿರುವುದು ಬರೇ ಮಣ್ಣಿನ ನೆಲ”

ನನ್ನ ಒಲವಂದಿತು ಮೆಲ್ಲನೆ ಕಿವಿಯೊಳಗೆ!

-     - ರೂಮಿಯ ಪ್ರೇರಣೆ

ಮುಂಜಾವು!

ಉಸಿರೊಳು ಉಸಿರ ಬೆರೆಸಿ

ಆತ್ಮದೊಳು ಆತ್ಮವ ಸೇರಿಸಿ

ಒಲುಮೆಯ ಸಾಗರದ ಅಲೆಯೊಳು

ಕೊಚ್ಚಿಹೋದ ಒಲಿದ ಜೀವಗಳ

ಮತ್ತೆ ದಡದತ್ತ ಸೆಳೆದು

ನವಿರು ನೆನಪುಗಳಿಗೆ ಕಚಗುಳಿಯಿಡುತ್ತಾ

ಎಬ್ಬಿಸುವ ಮುಂಗಾರಿನ ಮುಂಜಾವು!

ಮುಂದೆ ಬಂದರೆ ಹಾಯಬೇಡಿ, ಹಿಂದೆ ಬಂದರೆ ಒದೆಯಬೇಡಿ.

ನಿಮ್ಮ ಕಂದನೆಂದು ಕಾಣಿರಿ, ನನ್ನೀ ಮುದ್ದು ಕಂದನ!

ತನ್ನ ಕನಸುಗಳನ್ನು ಸಾಕಾರಗೊಳಿಸಲು ಸಿಲಿಕಾನ್ ನಗರಿಗೆ ಬರುತ್ತಿದ್ದಾನೆ ನನ್ನ ಕುವರ.

ನನ್ನೊಡೆಯನ ಅನುಗ್ರಹದೊಂದಿಗೆ ತಮ್ಮೆಲ್ಲರ ಶುಭ ಹಾರೈಕೆಗಳೂ ಅವನ ಜತೆಯಲ್ಲಿರುವುದು ಎಂದು ನಂಬುತ್ತೇನೆ.

ನನ್ನ  ದೃಷ್ಟಿ

ನನ್ನ  ಮನಸು

ನನ್ನ  ಬದುಕು

ಎಲ್ಲವೂ ಒಂದಾಗಿ ಹೋಗಿವೆ

ಒಲವಿನ ಮನದಲಿ ಅವಿತಿವೆ!

-ಪ್ರೇರಣೆ ರೂಮಿ

ಮಾರ್ಚ್ ತಿಂಗಳ ಸುಂದರ ಮುಸ್ಸಂಜೆಗಳ ಕಾವ್ಯ ರಸಧಾರೆ!!!

 
      ಮುಸ್ಸಂಜೆ  ಬರಹ!

 1.      
ಬಣ್ಣದ ಓಕುಳಿ ಚೆಲ್ಲಿ 

ಮುಗುಳ್ನಗುತ್ತಲೇ ತೆರೆಮರೆಗೆ 

ಸರಿಯುತ್ತಿರುವ ರವಿಯ 

ಬೀಳ್ಕೊಟ್ಟ 

ಹೊಸ ವರುಷದ 

ಮೊದಲ ಮುಸ್ಸಂಜೆ!

************

  2.
     ಶಿರದಿ ನವಿಲ ಗರಿಯ ಧರಿಸಿ

"ಗಿಲ್" "ಗಿಲ್" ಗೆಜ್ಜೆ ನಿನಾದದೊಂದಿಗೆ 

ಮುರಳಿಯ ಗಾನವನ್ನು ಮೇಳೈಸುತ್ತಾ

ಗೋಧೂಳಿಯ ನಡುವೆ ತನ್ನ ಗೆಳೆಯ 

ಗೋವಳರೊಡಗೂಡಿ ಬರುತ್ತಿರುವ 

ಗೋಪಾಲನಿಗಾಗಿ ಹೊಸ್ತಿಲ ಬಳಿ 

ಕಾದ ಯಶೋಧೆಯು ನಾನಾದಂತೆ 

ಕನಸ ತಂದ ಮುಸ್ಸಂಜೆಯಿದು!

           

******************

  3.
     ನನ್ನೆಲ್ಲ ಮನದ ಮಾತುಗಳ ಆಲಿಸಲೆಂದೇ

ನೀಲಾಗಸದಲ್ಲಿ ಹರಡಿರುವ ಬೆಳ್ಳಿಚುಕ್ಕಿಗಳ 

ತೋರುವ ಮುಸ್ಸಂಜೆಗೆ ಸುಸ್ವಾಗತ!

****************************

   4.
    ಹೊಸ್ತಿಲ ಬಳಿ ನಿಂತು 

ನಲ್ಲನ ನೆನಪುಗಳಲ್ಲಿ

ಕಳೆದು ಹೋದವಳಿಗೆ

ಸೊಳ್ಳೆ ಕಚ್ಚಿದಾಗ

ದುರ್ವಾಸ ಮುನಿಗಳ

ನೆನಪು ತಂದ

ಈ ಮುಸ್ಸಂಜೆ!

ಶಕುಂತಲೆ ದುಶ್ಯಂತನ ನೆನಪಿನಲ್ಲಿ ಕಳೆದುಹೋದದುರಿಂದ ತಾನೆ ದುರ್ವಾಸರ ಶಾಪ ಪಡೆದಳು! ಇಲ್ಲಿ  ಈ ನಲ್ಲೆ ಶಾಪದ ರೂಪದಲ್ಲಿ ಮಲೇರಿಯಾ ಪಡೆಯುವಳೇನೋ..:-)

********************************

   5.
    ಝಗಮಗಿಸುವ ಹರಳುಗಳಿಂದ ನೇಯ್ದ 

ತನ್ನ ಸೆರಗನ್ನು ನಿಶೆ ಬಾನ 

ತುಂಬಾ ಚೆಲ್ಲಿ ಮೆರೆದಾಗ 

ಮೆಲ್ಲನದ ಸರಿಸಿ ಇಣುಕುವ 

ಚಂದಿರನ ತೋರುವ ಮುಸ್ಸಂಜೆ!

*******************************

   6.
    ಬಿಸಿಲ ತಾಪದಿಂದ ನಲುಗಿದ ವಸುಂಧರೆಗೆ

ಮಿಣಿ ಮಿಣಿ ಮಿಂಚುವ ಹರಳುಗಳಿಂದ 

ನೇಯ್ದ ಕಡುನೀಲಿ ಚಾದರವನ್ನು ಹೊದಿಸಿ

ಜೋಜೋ ಲಾಲಿ ಹಾಡುತಿಹ ಮುಸ್ಸಂಜೆ!

***************************************

 7.
      ನಭದಲಿ ಹೊಳೆಯುತಿರುವ ಹುಣ್ಣಿಮೆಯ 

ಚಂದಿರನ ಬಿಂಬವ ತೋರುತ್ತಾ 

ಬಾಲ ರಾಮಚಂದಿರನಿಗೆ ತುತ್ತು 

ಉಣಿಸುತಿರುವ ಕೌಸಲ್ಯೆ ನಾನಾದೆನೆಂದು

ಕ್ಷಣ ಕಾಲ ಕನಸು ಕಂಡ

ಮುಸ್ಸಂಜೆ!

*****************************************
-

   8.

    ಕ್ಷಿತಿಜದೆಡೆ ಜಾರುತ್ತಿರುವ ರವಿಯ ಬೀಳ್ಕೊಟ್ಟು

ತನ್ನತನವ ಮೆರೆಯಲು ಹವಣಿಸುತಿರುವ

ಚಂದಮನಿಗೆ ತೆರೆದ ಬಾಹುಗಳಿಂದ 

ಮುಗುಳ್ನಗುತ್ತಾ ಸ್ವಾಗತ ಕೋರುವ ಮುಸ್ಸಂಜೆ!

*****************************************

  9.
     "ದೂದ ಪೀರೆ ಮಝ ಮದನ ಗೋಪಾಲ"

ಹಾಡಿ ಬಾಲಗೋವಳನಿಗೆ ನೇವೈದ್ಯ ಮಾಡಿದ

ಸಿಹಿಹಾಲಿಗಾಗಿ ತಮ್ಮಂದಿರೊಡನೆ ಸ್ಪರ್ಧಿಸಿ

ಕೊನೆಯ  ಗುಟುಕು ಸೇವಿಸಿ ಧನ್ಯತೆ 

ಪಡೆಯುತ್ತಿದ್ದ ನೆನಪು ಮರುಕಳಿಸಿದ ಮುಸ್ಸಂಜೆ!

*************************************************

  10.
     ಭಾವಗಳ ಗಂಟು ಬಿಚ್ಚಿ, 

ಒಲವಿಗೊಂದು ಓಲೆ 

ಬರೆಯುವ ಹೊತ್ತು

ಈ ಮುಸ್ಸಂಜೆ!

*************

11.
       "ಕಣ್ಣಾ ಮುಚ್ಚೇ ಕಾಡೇ ಗೂಡೇ...

ಬಿಟ್ಟೇ ಬಿಟ್ಟೆ...

ಕುವ್ಹಾ...ಕೂ...."

ಚುಕ್ಕಿ ಚಂದ್ರಮ

ಗ್ರಹಗಳು  ಜತೆಗೂಡಿ

ಕಣ್ಣುಮುಚ್ಚಾಲೆ ಆಡುತ್ತಿರುವ

ಮುಸ್ಸಂಜೆ!

**********************************

  12.
     ಸಣ್ಣನೆ ಬೀಸುವ 

ತಂಗಾಳಿಗೆ

ಜೋಕಾಲಿಯಾಡುವ

ತೆಂಗಿನ ಗರಿಗಳ 

ಎಡೆಯಿಂದ 

ನುಸುಳಿ, ಗವಾಕ್ಷಿಯಿಂದ

ಒಳನುಗ್ಗಿ 

ಕ್ಷಣಕೊಂದು ಬದಲಾಗುವ

ಕಪ್ಪು-ಬಿಳುಪು 

ಚಿತ್ತಾರವ 

ಕೋಣೆಯೊಳು ಚೆಲ್ಲಿ

ಮುದಕೊಡುವನು

ಶಶಿ ಈ 

ಮುಸ್ಸಂಜೆ!

******************************

  13.
     ನಲ್ಲನ ಬರವನ್ನೇ ಕಾಯುತ್ತಿರುವ

ನಲ್ಲೆಯ ಗಲ್ಲಕ್ಕೆ ರಂಗನ್ನು ಮೆತ್ತಿ 

ನಲ್ಲನಿಗೆ ಮತ್ತೇರಿಸುವ ಮುಸ್ಸಂಜೆ!

*****************************

   14.
    ದಿನದ ಪಾಳಿ ಮುಗಿಸಿ

ರಂಗಮಂಟಪದ ಪರದೆಯ ಜಾರಿಸಿ

ಅತ್ತ ರವಿ ಸರಿದನು!

ಇತ್ತ ಝಗಮಗಿಸುವ ಬೆಳಕಿನಲ್ಲಿ

ಹೊಸ ಆಟ ತೋರಲು

ತೆರೆ ಮೇಲೇರಿಸಲು ಕಾದಿರುವ

ನಿಶೆಗೆ ಸ್ವಾಗತ ಕೋರುತಿಹಳು

ಸಂಧ್ಯೆ!

***********************************

   15.
    ಬೆಳ್ ಬೆಳದಿಂಗಳು

ಮಿನುಗುವ ಚುಕ್ಕಿ 

ಮಲ್ಲಿಗೆಯ ಕಂಪು

ಸಾಕಲ್ಲವೆ; ಅದೋ

ಕೇಳುತ್ತಿದೆಯೇ ಮುಸ್ಸಂಜೆ,

ನನ್ನೆದೆಯೊಳಗಿನ ಭಾವ

ಗೆಜ್ಜೆಯ ನಾದ!

*************************

   16.

    ದಿನದ ಧಾವಂತದ ಓಟಕೊಂದು ಅಲ್ಪ ವಿರಾಮವಿತ್ತು

ಈ ಹೊಂಬೆಳಕಿನ ಮುಸ್ಸಂಜೆಯಲ್ಲಿ

ಬಾಲ್ಯದ ಸವಿನೆನಪಿನ ಸಿಹಿ ಮೆಲ್ಲುತ್ತಾ

ಚಾ ಕುಡಿಯುವ ಸಂಜೆ!

***************************

  17.
     ಮನದ ಕೊಳದೊಳು ಇಣುಕಿ 

ತನ್ನ ಬಿಂಬವನಲ್ಲಿ ಚೆಲ್ಲಿ 

ಹೆಪ್ಪುಗಟ್ಟಿದ ಭಾವವ ಕರಗಿಸಿ 

ಖುಷಿ ತರುವ ಶಶಿ!

ಮುಸ್ಸಂಜೆ ಮೂಡಿತೀ ಪರಿಯಲಿ!

***********************************

   18.
    ಅಲ್ಲೂ ಕತ್ತಲು

ಇಲ್ಲೂ ಕತ್ತಲು

ಅಲ್ಲಿ ಶಶಿಯ ಉದಯ

ಇಲ್ಲಿ ಒಲವಿನ ಉದಯ

ನಮ್ಮ ಬದುಕಿಗೆ 

ಮುಸ್ಸಂಜೆಯ ಕಾಣಿಕೆ!

*************************

   19.
    ತವರು ಮನೆಯಿಂದ ಕೇಳಿ ಬಂದ ತಾಳದ ನಾದ

ನೆರೆಮನೆಯಿಂದ ತೇಲಿ ಬಂದ ಅಗರುಬತ್ತಿಯ ಗಂಧ

ಮೇಲಿನರಮನೆಯಿಂದ ಚೆಲ್ಲುವ ತಿಂಗಳ ಬೆಳಕು

ಅನುರಾಗ ಹೊಮ್ಮಿಸುತ್ತಿರುವ ಬಾನ ತಾರೆಯರು

ಆಹಾ! ಎಂತಹ ಸೊಬಗಿನ ಮುಸ್ಸಂಜೆಯಿದು!

***************************************

 20.
      ಹಗಲೆಲ್ಲಾ ಅವನ ಸಂದೇಶಗಳ ನಿರೀಕ್ಷೆಯಲ್ಲೇಕಳೆಯಿತು...

ಹ್ಞೂಂ, ಸುಳಿವೇ ಇಲ್ಲ...

ಜತೆ ಕೊಟ್ಟ ಭಾನು ಬೆನ್ನು ಹಾಕಿ ನಡೆದೇ ಬಿಟ್ಟ...

ಸುಕುಮಾರಿ, ನಾನಿರುವಿನೇ ನಿನ್ನ ಜತೆ...

ಅನ್ನುತಲೇ ತೇರನೇರಿ ಕುಳಿತು ನಲ್ಲೆಯ

ಮಾತುಗಳಿಗೆ ಕಿವಿಯಾದ ಶಶಿ...

ಮುಸ್ಸಂಜೆಯಲಿ ಹೊಮ್ಮಿತು ವಿರಹ ಮನದ ಕಾವ್ಯ!

*****************************************

 21.
      ನಕ್ಷತ್ರಗಳ ಪಡೆಯ ನಡುವೆ ಹೊಳೆಯುವ ಬಿದಿಗೆ ಚಂದಿರನೇ,

ಒಯ್ಯೋ ನನ್ನೀ ಕಾವ್ಯವ ಅತ್ತ ಅವಳೆಡೆ..

ಕಾದಿರುವಳು ಆಕೆ ದಿನವಿಡೀ...

ಅದೇಕೋ ಇಂದೇ ಮಲಗಿದೆ ಅಡ್ಡ ಜಂಗಮವಾಣಿ...

ಒಂದಿಷ್ಟು ಪುಣ್ಯ ಕಟ್ಟಿಕೋ...

ನನ್ನೆದೆಯ ಭಾವವೇ ಹರಿದಿದೆ... 

ಒಲುಮೆಯ ಕಾವ್ಯದ ಓಲೆಯಾಗಿ...

ಕಣ್ಣಾಡಿಸಬೇಡ... ನಗಬೇಡ...

ನಾ ಕಾಳಿದಾಸನೂ ಅಲ್ಲ,

ನಾ ಕೆ.ಎಸ್ ನರಸಿಂಹ ಸ್ವಾಮಿಯೂ ಅಲ್ಲ...

ನಾ ಕೇವಲ ಹುಚ್ಚ...

ನನ್ನೊಲುಮೆಯ ದಾಸ...

ಅದರರಿವಿದೆ ಅವಳಿಗೆ..

ನನಗಷ್ಟು ಸಾಕು...

ಇನ್ನೇನು ಬೇಕು 

ವಿರಹಿ ಪ್ರೇಮಿಗೆ!

ಈ ಮುಸ್ಸಂಜೆಯಲಿ ಮೂಡಿದ ವ್ಯಾಲಂಟೈನ್ ಗೀತೆ!

**********************************************

  22.
     ದಿನದ ಪಾಳಿ ಮುಗಿಸಿ

ರಂಗಮಂಟಪದ ಪರದೆಯ ಜಾರಿಸಿ

ಅತ್ತ ರವಿ ಸರಿದನು!

ಇತ್ತ ಝಗಮಗಿಸುವ ಬೆಳಕಿನಲ್ಲಿ

ಹೊಸ ಆಟ ತೋರಲು

ತೆರೆ ಮೇಲೇರಿಸಲು ಕಾದಿರುವ

ನಿಶೆಗೆ ಸ್ವಾಗತ ಕೋರುತಿಹಳು

ಸಂಧ್ಯೆ!

********************************************

  23.
     ಸ್ಫೂರ್ತಿ ಪಡೆಯಲೆಂದು ನೆಟ್ಟೆ ದೃಷ್ಟಿ ಬಾನಿನತ್ತ...

ಮಿಣುಕು ತಾರೆಯರ ನಡುವೆ ಕಾಣಿಸಿತು ಅವನ ಬಿಂಬ...

ನವಿರಾದ ಕಂಪನ ನನ್ನೊಳಗೆ... 

ಮನ ಬಿಚ್ಚಿ ನಾ ಹಾಡಿದೆ...

ಮಾಮರದಿ ಕುಹೂ ಕುಹೂ ಗಾನವೂ ಮಾರ್ದನಿಸಿತು...

ಅಪೂರ್ವ ಅನುಭೂತಿಯನಿತ್ತು ಮುದವಿತ್ತ  ಮುಸ್ಸಂಜೆ!

****************************************

   24.
    ವಸಂತನ ಆಗಮನದ ಸಂಭ್ರಮವೆಲ್ಲೆಡೆ

ಹೊಸ ಚಿಗುರು ಸುತ್ತಮುತ್ತ

ಹಕ್ಕಿಗಳ ಚಿಲಿಪಿಲಿ ಗಾನ

ಹೊಸ ಲಹರಿ ಎದೆಯೊಳಗೆ

ಪೂರ್ಣ ಚಂದಮನ ನೋಟ

ಕಡು ನೀಲಿ ಆಗಸದಲಿ 

ತಂಪೆರೆಯಿತು ಆರ್ದ ಮನಕೆ

ಹೊಸ ಪಲ್ಲವಿ ಹಾಡಿತು

ನಲ್ಲೆಯ ಮನ ಈ 

ಮುಸ್ಸಂಜೆಯಲಿ!

******************************

  25.
     ||ಮಾಮರದ ಮೇಲೊಂದು ಕೋಗಿಲೆ||

||ನದಿತೀರದ ಕಲ್ಲ ಮೇಲೊಂದು ಕೊಳಲು||

||ಆ ಕಾಮನ ಬಿಲ್ಲ ಮೇಲೊಂದು ನಲ್ಲನ ಬಿಂಬ||

||ಈ ನಲ್ಲೆಯ ನಾಸಿಕದ  ಮೇಲೊಂದು ನತ್ತು||

||ಕಡುನೀಲಿ ನಭದ ಮೇಲೊಂದು ಬೆಳ್ಳಿ ಬಟ್ಟಲು||

     ||ಈ ಹುಣ್ಣಿಮೆ ರಾತ್ರಿಯಲೊಂದು ರಾಸಕ್ರೀಡೆ||

     ||ಈ ಮುಸ್ಸಂಜೆಯಲೊಂದು ಮಧುರ ರಸ ಕಾವ್ಯ||

************************

26.
ಕತ್ತಲೆಯ ಗರ್ಭವನು ಸೀಳಿ ಕುಲು ಕುಲು ನಗುವ ಚುಕ್ಕಿಗಳು

ಮೋಡದ ಮರೆಯಲಿ ಅಡಗಿ ನಲ್ಲೆಯ ಓಲೆಯನೋದುವ ಚಂದಿರ

ಗೂಡಿಗೆ ಮರಳಿದ ಹಕ್ಕಿಗಳ ಮೌನ ಜೋಗುಳ

ಮುಂಗುರುಳ ಜತೆ ಆಟವಾಡುತ್ತ ನಲ್ಲನ ಸಂದೇಶ ಪಿಸುಗುಟ್ಟುವ ತಂಗಾಳಿ

ಅಪ್ಪಿ ಹಿಡಿದ ಮುದ್ದು ಸೊಸೆಯ ಎಂಜಲಿನ ಅಭಿಷೇಕ ಗಲ್ಲಕ್ಕೆ

ಆಹಾ! ಸವಿ ಸವಿ ಮುಸ್ಸಂಜೆ!

**********************************

27.ಹಲವು ಹಂಬಲಗಳ ತರುವ ಶಶಿಯ ತೋರುವ ಮುಸ್ಸಂಜೆ!

___________________________________

ತಲೆಯೆತ್ತದೆ ನಡೆದವಳ ಕೆಣಕಿ ಪ್ರಶ್ನಿಸಿದ...

"ಅದೇನೆ ಇಂದು ಬರೆಯಲು ಸ್ಫೂರ್ತಿ ಬೇಡವೆ! ಇಂದೇಕೆ ನೋಟವಿಲ್ಲವಿತ್ತ?"

"ನನ್ನಲ್ಲಿ ಹುಟ್ಟಿಸುವೆ ನೀ ಹಲವು ಹಂಬಲಗಳನು..

ನಿನ್ನ ತೋರುತಾ ರಾಮನಿಗೆ ಉಣಿಸುವ ಕೌಸಲ್ಯೆಯಾಗುವಾಸೆ,

ಬೆಳದಿಂಗಳಲ್ಲಿ ರಾಧೆಯಾಗಿ ಕೃಷ್ಣನೊಡನೆ ಯಮುನಾತೀರದಲಿ ಕೋಲಾಟವಾಡುವಾಸೆ,

ಕೈಲಾಸಗಿರಿಯಲಿ ಶೈಲಜೆಯಾಗಿ ಪರಮೇಶನ ಸೇವೆಮಾಡುವಾಸೆ,

ಹಕ್ಕಿಯಾಗಿ ಹಾರಿ ನಿನ್ನೂರಿಗೆ ಬರುವಾಸೆ,

ನಿನ್ನ ಮೋಹಕ ಬೆಳಕನ್ನು ಪುಟ್ಟ ಕ್ಯಾನ್ವಾಸಿನಲ್ಲಿ ಬಂಧಿಸುವಾಸೆ,

ಮಿಂಚುವ ಚುಕ್ಕಿಯಾಗಿ ಆಗಸದಲಿ ಮೆರೆಯಬೇಕೆಂಬಾಸೆ... "

ಹಂಬಲಗಳ ಪಟ್ಟಿಯನ್ನು ಕೇಳುತ ಸೋತ ಚಂದಿರ!

ಅವನಿಗೆ ಪಟ್ಟಿಯ ಕೊಡುತ ನಾನೂ ಸೋತ ಮುಸ್ಸಂಜೆ!

 ********************************

28.
ಗೆಜ್ಜೆಯ ಸದ್ದು ಮಾಡುತ್ತಾ

ಬಂದ ಸಂಧ್ಯೆ ಕಣ್ಮುಚ್ಚಿ

ಒಯ್ದಳು ನಲ್ಲನಿರುವ ಚಂದ್ರಲೋಕಕೆ

ತೂಗುಯ್ಯಾಲೆಯಲಿ ಪವಡಿಸಿದ ಅವನ

ಬಾಹುಬಂಧನದಲಿ ಅಡಗಿದೆ ನಾ

ಪಾವನವಾಯಿತು ನನ್ನೀ ಮುಸ್ಸಂಜೆ!

***********************************

ಒಲವಿನ ಪ್ರೇರಣೆ!

ಅರೇ, ನಾನ್ಯಾವಾಗ ಈ ಹಾದಿಗೆ ತಿರುಗಿದೆ

ನಾನೇ ಅಕ್ಕರೆಯಿಂದ ಆರಿಸಿದ ಹಾದಿ ತಪ್ಪಿದೆನೇ

ಗೊಂದಲದ ಭಾವ ಕ್ಷಣ ಮಾತ್ರ...

ಮುಖದ ಮೇಲೆ ಮೂಡಿದ ನಸುನಗು ತಿಳಿಸಿತು

’ಇದೆಲ್ಲಾ ನೀನೇ ಅಷ್ಟೇ ಅಕ್ಕರೆಯಿಂದ ಆರಿಸಿದ ಒಲವಿನ ಪ್ರೇರಣೆ ಕಣೇ!’

-ಪ್ರೇರಣೆ ರೂಮಿ

ಭ್ರಮೆ!

ಭ್ರಮೆಯ ಜತೆ ಬಿಸಿಯುಸಿರಿನ ಹಬೆಯೂ ಮನದ ಕನ್ನಡಿಯ ಮಸುಕು ಮಾಡಿತ್ತು.

ಅದ ಒರೆಸಿ ವಿಧಿ ಅವಳೆದುರು ಹಿಡಿದ ಪರಿಗೆ ಕನೆಸೆಲ್ಲಾ ಕರಗಿ ಕಣ್ಣೀರಾಗಿ ಹರಿದಿತ್ತು,