ಮಡಿಲ ತುಂಬಾ ಸಂಪಿಗೆ!

ಬಿಸಿ  ಚಾದೊಳಗೆ ಬಿಸ್ಕಿಟ್ ಅದ್ದಿ
ಚಪ್ಪರಿಸಿ ಮೆಲ್ಲುತ ಕುಳಿತ ಅವನು;

ಅಕ್ಷರಗಳ ಹರಡಿ ಪೆನ್ನು ಕಚ್ಚುತ
ಕವನ ಕಟ್ಟಲು ಕುಳಿತ ನಾನು;

ಕಣ್ಮುಚ್ಚಾಲೆ ಆಡುತ ಮುಗಿಲ ಮರೆಯಿಂದಲೇ
ಸಾಗರದೊಳಗೆ ಜಾರಿದ ಭಾನು;

ಸಂಪಿಗೆ ಘಮ ಎಲ್ಲೆಲ್ಲೂ
ಮುಸ್ಸಂಜೆ ತುಂಬಿಸಿದಳು ಮಡಿಲು!

ರಾಗರಂಜಿತ ಮುಸ್ಸಂಜೆ..

ಭಟ್ಟಂಗಿಗಳ ಮೆಚ್ಚುಗೆಗೆ ರಾಗ ರಂಜಿತಳಾಗಿ 

ನನ್ನ ಸೆರಗಿನೆಡೆಯಲಿ ಮುಖ ಮರೆಸಿಕೊಂಡ ಮುಸ್ಸಂಜೆ!

ಕಡಲಿನಾಳಕೆ ಜಾರಿ ಚಿಪ್ಪು, ಮುತ್ತು, ಹವಳ ಹೆಕ್ಕಿ ತಂದು ಬಾನ ತುಂಬ ನೇತಾಡಿಸಿದ ಮುಸ್ಸಂಜೆ!

ಅಂದಿನ ಮುಸ್ಸಂಜೆಯ ನೆನಪು..

-
ನೇಸರ ಕುಲುಮೆಯಲಿ ಕೆಂಪಗೆ ಬೆಂದು ಹೊನ್ನಾದನು..

ಶಶಿ ಬೆಳದಿಂಗಳಲಿ ಶುಭ್ರವಾಗಿ ಮಿಂದು ಬೆಳ್ಳಿಯಾದನು..

ಅಜ್ಜಿ ನೆರಿಗೆ ಮೂಡಿದ ಕೈಯಲಿ ಹೊಸೆದ ಮೆದು ಹತ್ತಿ ಬತ್ತಿಯಾಯಿತು..

ಅಜ್ಜನ ಹೊಲದ ಬೀಜ ಚಕ್ರಗಳೆಡೆಯಲಿ ಅಪ್ಪಚ್ಚಿಯಾಗಿ ದಪ್ಪ ಎಣ್ಣೆಯಾಯಿತು..

ಅತ್ತೆ ಘಸ ಘಸ ತಿಕ್ಕಿದ ಹಿತ್ತಾಳೆ ದೀಪ ಝಗಮಗ ಹೊಳೆಯಿತು..

ಮೈತುಂಬ ಮಣ್ಣು ಮೆತ್ತಿ ಚಿಣ್ಣರು ಧೂಳೆಬ್ಬಿಸುತ ಗದ್ದಲ ಮಾಡುತ ಅರಳುತ ಮರಳಿದರು..

ತುಳಸಿ ಕಟ್ಟೆಯ ದೀಪದ ಬೆಳಕು ಅಮ್ಮನ ಸಂತೃಪ್ತ ಮುಖದಲಿ ಪ್ರತಿಫಲಿಸಿತು..

ಅಜ್ಜಿ, ಅಜ್ಜ, ಅತ್ತೆ ಸೊಸೆ.. ಚಿಣ್ಣರೆಲ್ಲರ ರಾಗ ದೇವರ ಮನೆಯಲಿ ವ್ಯಾಪಿಸಿತು..

ಹಾರ್ಮೋನಿಯಮ್, ತಾಳ, ತಬಲ ನಾದ ತರಂಗ ಭಕ್ತಿ ಸಾಗರದ ಅಲೆಯಾಯಿತು..

ಧೂಪ, ದೀಪ, ಕರ್ಪೂರ, ಅಗರಬತ್ತಿಯ ಹೊಗೆಯೆಡೆಯಲಿ ಬೆಳಗುವ ಮಂಗಳಾರತಿ ಎತ್ತಿದರು..

ಒಕ್ಕೊರಳಿನಿಂದ ರಾಗ ತಾಳ ಪಲ್ಲವಿ ಸೇರಿಸಿ ಮುಸ್ಸಂಜೆಯ ಜೋಳಿಗೆಯಲಿ ಭಾವ ತುಂಬಿದರು!

(ಅಂದಿನ ದಿನದ ನೆನಪು ತಂದ ಮುಸ್ಸಂಜೆಗೆ ಅರ್ಪಿತ)

ಮುಸ್ಸಂಜೆ.. ರಾಗ!

-

ಅದಾವ ಮಾಯದಲಿ ಬಾನಿಗೆ ನೆಗೆದವನು

ಚಂದ್ರಿಕೆಯ ಮೋಹ ಜಾಲದಲಿ ಸೆರೆಯಾದನು

ಮುಗಿಲಮರೆಯಲಿ ಮರೆಯಾದ ಇಂದುವಿಗೀಗ ಲಜ್ಜೆ

ಹೊರಗೆಳೆದು ವದನ ಅನಾವರಣಗೊಳಿಸಿದಳು ಮುಸ್ಸಂಜೆ!

ಉತ್ತರ ಸರಿಯೋ ತಪ್ಪೋ.. ಹೇಳು ನೀ ಮುಸ್ಸಂಜೆ!

ಕೂಡಿಸಿ, ಗುಣಿಸಿ, ಭಾಗಸಿ, ಕಳೆದು.. ಕೊನೆಗೂ ಈ ಪುಸ್ತಕದ ಲೆಕ್ಕಕ್ಕೇನೋ ಉತ್ತರ ಸಿಕ್ಕಿತು

ಮನದ ಮೂಲೆ ಮೂಲೆಯಲ್ಲೂ ಹೀಗೇ ಕೂಡಿಸಿ, ಕಳೆದು, ಭಾಗಿಸಿ, ಗುಣಿಸಿದ ಲೆಕ್ಕಗಳು ಚೆಲ್ಲಾಪಿಲ್ಲಿ..

ಎಲ್ಲವನ್ನೂ ಪೇರಿಸಿ ಹೆಣಗಾಡಿ..

ಉತ್ತರವೇನೋ ಸಿಕ್ಕಿತು

ಸರಿ ತಪ್ಪು ಹೇಳಬೇಕಾದವಳು ನೀ ಮಾತ್ರ ಮೌನಿ

ನಾಳೆ ಮತ್ತೆ ಬರುವಿಯಲ್ಲ..

ಉತ್ತರ ಹೇಳದೇ ಮರಳಲು ಬಿಡುವುದಿಲ್ಲ ಮುಸ್ಸಂಜೆ ನಿನ್ನ!

ಮುತ್ತಿಗೆ ಸಾಕ್ಷಿ- ಮುಸ್ಸಂಜೆ!

ಬಾನಲಿ ಹರಡಿತ್ತು
ಬಣ್ಣ

ಬಾಗಿಲು ತಟ್ಟಿದನು
ಮೆಲ್ಲ

ಯಾಕೆ ಕೆಂಪಾಯಿತು
ಗಲ್ಲ

ಹೇಳು ಯಾರದು
ಕಳ್ಳ

ಅವನ ಹೆಸರು
ಮಳ್ಳ

ಕೊಟ್ಟನೆ ಅವನು
ಮುತ್ತ

ಅದ್ಯಾಕೆ ಅಷ್ಟು
ಲಜ್ಜೆ!

ನಲ್ಲಿರುಳಿಗೆ ಮುನ್ನುಡಿ.. ಮುಸ್ಸಂಜೆ ಬರೆವಳು!

ಕೈ ನೀಡು, ಮೇಲೆಳೆದು ಬಿಡು..

ವೇದಿಕೆ ಸಜ್ಜು ಮಾಡು..

ಪರದೆಯನೆತ್ತು.. ಬೆಳಕು ಚೆಲ್ಲು..

ಕುಣಿವಳು ಮಂಕುತನವನೆಲ್ಲ ಮರೆತು..

ಬಿಂಕತನವಿಲ್ಲ ಅವಳಿಗೆ ಒಂಚೂರು

ನಮ್ಮಲ್ಲಿ ತನುಮನವ ಬೆರೆಸಲು

ಮುನ್ನುಡಿ ಬರೆವಳು ಮಧುರ ನಲ್ಲಿರುಳಿಗೆ

ನಮ್ಮವಳವಳಲ್ಲವೇ ಅವಳೇ ಮುಸ್ಸಂಜೆ!!

-

ಮುಸ್ಸಂಜೆ ಗೆಜ್ಜೆ ಹೆಜ್ಜೆ..

ನುರಿತ ಚಿತ್ರಗಾರನಂತೆ ರಂಗುಗಳ ಹದವಾಗಿ ಬೆರೆಸಿ.. ಅಲ್ಲಲ್ಲಿ ಚೆಲ್ಲಿ, ಚೌಕಟ್ಟಿಲ್ಲದ ವಿಸ್ತಾರದ ಕ್ಯಾನ್ವಾಸಿನಲಿ ತನ್ನ ಸಹಿ ಮಾಡಿ ಅತ್ತ ನಡೆವ ಅವಸರ ಅವನಿಗೆ..

ಮಾಗಿಯ ಚಳಿಯಲಿ ತನ್ನ ಪೂರ್ಣ ಮೊಗ ತೋರಿ ನಲ್ಲ ನಲ್ಲೆಯರಿಗೆ ನಶೆಯೇರಿಸುವ ಹಂಬಲದಿ ಉದಯಿಸುವ ಅವಸರ ಇವನಿಗೆ..

ಮನದ ಅಂಗಣಕೆ ಬಡಿದು ನವಿರು ಕಂಪನ ಕೊಡುವ ಭಾವಲೆಗಳ ಹೊಡೆತದ ಕಾಟ ಕಳಚುವ ಅವಸರ ಇವಳಿಗೆ..

ಈ ವೇದಿಕೆಯಲಿ ಅವನಿವನು, ಅವಳಿವಳು ತನ್ನ ಬಣ್ಣಿಸುವ ಕಾವ್ಯವರ್ಷದಲಿ ಮುಳುಗೇಳಿ, ಗೆಜ್ಜೆ ಕಟ್ಟಿ “ತಕಿಟ ತಕಿಟ ಧಿಂ ಧಿಮಿತ ತಕಿಟ ತಾಂ” ಕುಣಿದು ದಣಿಯುವ ತವಕ ಅವಳಿಗೆ,

ಅದೇ ನಮ್ಮ ಮುದ್ದು ಮುಸ್ಸಂಜೆಗೆ!

ಮತ್ತೆ ಬಂದಳವಳು.. ನಮ್ಮವಳು ಮುಸ್ಸಂಜೆ!

------------------------------------

ನಸುಗೆಂಪು, ಹಳದಿ, ಕೇಸರಿ, ನೇರಳೆ..

ರಂಗು ರಂಗಿನ ತೆಳ್ಳಗಿನ ಲೆಹಂಗ..

ಹಸುರು ಹೊನ್ನ ಕುಸುರಿ ಕುಪ್ಪಸ..

ತೂಗಾಡುತಿರುವ ಹರಳಿನ ಝುಮುಕಿ..

ತುಂಬಿದೆದೆಯ ಮೇಲೆ ಭಾರದ ಕೆಂಪು ಪದಕ..

ತೆಳು ಸೊಂಟಕೆ ಬಿಗಿದ ಮುತ್ತಿನ ಜಾಲರಿ..

ಘಮ ಘಮ ಮಂಗಳೂರು ಮಲ್ಲಿಗೆ ಸುತ್ತಿದ ನೀಲವೇಣಿ..

ಬೆಳ್ಳಿಗೆಜ್ಜೆಗಳ ಝಲ್ ಝಲ್ ನಾದ,..

ಬಂದಳು ಮತ್ತೆ ನಮ್ಮವಳು.. ಅವಳೇ,

ಮುಸ್ಸಂಜೆ ಮನದಂಗಳದಲಿ ಅರಳಿದಳು!

ಮುಸ್ಸಂಜೆ ಹಾಗೂ ಮುಂಜಾವು... ತಂದ ಅನುಭಾವ!!!

ಅಂದು ಚಂದ್ರೋದಯವಾಗುವುದೇ ತಡ

ತೆರೆದುಕೊಳ್ಳುತ್ತಿದ್ದವು ಭಾವಗಳು

ದನಿಯೆತ್ತಿ ಹಾಡುವ ರಾಗಕೆ ಚುಕ್ಕಿಗಳ

ಸುಸ್ವರವೂ ಸೇರಿ ಬಾನ ತುಂಬಾ ಮಾರ್ದನಿ

ಗೋಡೆಯ ಮೇಲೆ ಮೂಡುವ ಈ ಹಾಡಿಗೆ

ಹತ್ತು ಹಲವು ಮನಗಳ ಚಿತ್ತಾರಗಳ ಮೋಡಿ

ಶಾಂತ ಮನವು ನಿಶೆಯ ವಶವಾಗುವುದೇ ತಡ

ಬರುವ ಅವನ ಪ್ರೇಮ ಸಿಂಚನದ

ಬೆಚ್ಚನೆಯ ಹೊದಿಕೆ..

ಇಂದು ಎಲ್ಲವೂ ಮರೆಯಾಗಿ

ನಿಶೆಯೂ ಮೌನಿಯಾದಾಗ, ಮನವು ನರಳಿದಾಗ,

ಕಣ್ಣೆವೆಗಳು ತೆರೆದೇ ಉಳಿದಾಗ,

ಸ್ನೇಹ ಹಸ್ತಗಳು ಎದೆಗಾನಿಸಿ,

ಕುಸಿದು ಹೋದ ಸ್ಥೈರ್ಯವನು ಮರಳಿಸಿದವು

ಕತ್ತಲು ಕರಗಿ ಮೂಡಿದ ಮುಂಜಾನೆ

ಹಚ್ಚಿತು ಹಣತೆ ನನ್ನೆದೆಯ ಗುಡಿಯೊಳಗೆ

ಕನಸುಗಳು ಮರಳಿದವು ಗೂಡಿನೊಳಗೆ!

  

ಮಾರ್ಚ್ ತಿಂಗಳ ಸುಂದರ ಮುಸ್ಸಂಜೆಗಳ ಕಾವ್ಯ ರಸಧಾರೆ!!!

 
      ಮುಸ್ಸಂಜೆ  ಬರಹ!

 1.      
ಬಣ್ಣದ ಓಕುಳಿ ಚೆಲ್ಲಿ 

ಮುಗುಳ್ನಗುತ್ತಲೇ ತೆರೆಮರೆಗೆ 

ಸರಿಯುತ್ತಿರುವ ರವಿಯ 

ಬೀಳ್ಕೊಟ್ಟ 

ಹೊಸ ವರುಷದ 

ಮೊದಲ ಮುಸ್ಸಂಜೆ!

************

  2.
     ಶಿರದಿ ನವಿಲ ಗರಿಯ ಧರಿಸಿ

"ಗಿಲ್" "ಗಿಲ್" ಗೆಜ್ಜೆ ನಿನಾದದೊಂದಿಗೆ 

ಮುರಳಿಯ ಗಾನವನ್ನು ಮೇಳೈಸುತ್ತಾ

ಗೋಧೂಳಿಯ ನಡುವೆ ತನ್ನ ಗೆಳೆಯ 

ಗೋವಳರೊಡಗೂಡಿ ಬರುತ್ತಿರುವ 

ಗೋಪಾಲನಿಗಾಗಿ ಹೊಸ್ತಿಲ ಬಳಿ 

ಕಾದ ಯಶೋಧೆಯು ನಾನಾದಂತೆ 

ಕನಸ ತಂದ ಮುಸ್ಸಂಜೆಯಿದು!

           

******************

  3.
     ನನ್ನೆಲ್ಲ ಮನದ ಮಾತುಗಳ ಆಲಿಸಲೆಂದೇ

ನೀಲಾಗಸದಲ್ಲಿ ಹರಡಿರುವ ಬೆಳ್ಳಿಚುಕ್ಕಿಗಳ 

ತೋರುವ ಮುಸ್ಸಂಜೆಗೆ ಸುಸ್ವಾಗತ!

****************************

   4.
    ಹೊಸ್ತಿಲ ಬಳಿ ನಿಂತು 

ನಲ್ಲನ ನೆನಪುಗಳಲ್ಲಿ

ಕಳೆದು ಹೋದವಳಿಗೆ

ಸೊಳ್ಳೆ ಕಚ್ಚಿದಾಗ

ದುರ್ವಾಸ ಮುನಿಗಳ

ನೆನಪು ತಂದ

ಈ ಮುಸ್ಸಂಜೆ!

ಶಕುಂತಲೆ ದುಶ್ಯಂತನ ನೆನಪಿನಲ್ಲಿ ಕಳೆದುಹೋದದುರಿಂದ ತಾನೆ ದುರ್ವಾಸರ ಶಾಪ ಪಡೆದಳು! ಇಲ್ಲಿ  ಈ ನಲ್ಲೆ ಶಾಪದ ರೂಪದಲ್ಲಿ ಮಲೇರಿಯಾ ಪಡೆಯುವಳೇನೋ..:-)

********************************

   5.
    ಝಗಮಗಿಸುವ ಹರಳುಗಳಿಂದ ನೇಯ್ದ 

ತನ್ನ ಸೆರಗನ್ನು ನಿಶೆ ಬಾನ 

ತುಂಬಾ ಚೆಲ್ಲಿ ಮೆರೆದಾಗ 

ಮೆಲ್ಲನದ ಸರಿಸಿ ಇಣುಕುವ 

ಚಂದಿರನ ತೋರುವ ಮುಸ್ಸಂಜೆ!

*******************************

   6.
    ಬಿಸಿಲ ತಾಪದಿಂದ ನಲುಗಿದ ವಸುಂಧರೆಗೆ

ಮಿಣಿ ಮಿಣಿ ಮಿಂಚುವ ಹರಳುಗಳಿಂದ 

ನೇಯ್ದ ಕಡುನೀಲಿ ಚಾದರವನ್ನು ಹೊದಿಸಿ

ಜೋಜೋ ಲಾಲಿ ಹಾಡುತಿಹ ಮುಸ್ಸಂಜೆ!

***************************************

 7.
      ನಭದಲಿ ಹೊಳೆಯುತಿರುವ ಹುಣ್ಣಿಮೆಯ 

ಚಂದಿರನ ಬಿಂಬವ ತೋರುತ್ತಾ 

ಬಾಲ ರಾಮಚಂದಿರನಿಗೆ ತುತ್ತು 

ಉಣಿಸುತಿರುವ ಕೌಸಲ್ಯೆ ನಾನಾದೆನೆಂದು

ಕ್ಷಣ ಕಾಲ ಕನಸು ಕಂಡ

ಮುಸ್ಸಂಜೆ!

*****************************************
-

   8.

    ಕ್ಷಿತಿಜದೆಡೆ ಜಾರುತ್ತಿರುವ ರವಿಯ ಬೀಳ್ಕೊಟ್ಟು

ತನ್ನತನವ ಮೆರೆಯಲು ಹವಣಿಸುತಿರುವ

ಚಂದಮನಿಗೆ ತೆರೆದ ಬಾಹುಗಳಿಂದ 

ಮುಗುಳ್ನಗುತ್ತಾ ಸ್ವಾಗತ ಕೋರುವ ಮುಸ್ಸಂಜೆ!

*****************************************

  9.
     "ದೂದ ಪೀರೆ ಮಝ ಮದನ ಗೋಪಾಲ"

ಹಾಡಿ ಬಾಲಗೋವಳನಿಗೆ ನೇವೈದ್ಯ ಮಾಡಿದ

ಸಿಹಿಹಾಲಿಗಾಗಿ ತಮ್ಮಂದಿರೊಡನೆ ಸ್ಪರ್ಧಿಸಿ

ಕೊನೆಯ  ಗುಟುಕು ಸೇವಿಸಿ ಧನ್ಯತೆ 

ಪಡೆಯುತ್ತಿದ್ದ ನೆನಪು ಮರುಕಳಿಸಿದ ಮುಸ್ಸಂಜೆ!

*************************************************

  10.
     ಭಾವಗಳ ಗಂಟು ಬಿಚ್ಚಿ, 

ಒಲವಿಗೊಂದು ಓಲೆ 

ಬರೆಯುವ ಹೊತ್ತು

ಈ ಮುಸ್ಸಂಜೆ!

*************

11.
       "ಕಣ್ಣಾ ಮುಚ್ಚೇ ಕಾಡೇ ಗೂಡೇ...

ಬಿಟ್ಟೇ ಬಿಟ್ಟೆ...

ಕುವ್ಹಾ...ಕೂ...."

ಚುಕ್ಕಿ ಚಂದ್ರಮ

ಗ್ರಹಗಳು  ಜತೆಗೂಡಿ

ಕಣ್ಣುಮುಚ್ಚಾಲೆ ಆಡುತ್ತಿರುವ

ಮುಸ್ಸಂಜೆ!

**********************************

  12.
     ಸಣ್ಣನೆ ಬೀಸುವ 

ತಂಗಾಳಿಗೆ

ಜೋಕಾಲಿಯಾಡುವ

ತೆಂಗಿನ ಗರಿಗಳ 

ಎಡೆಯಿಂದ 

ನುಸುಳಿ, ಗವಾಕ್ಷಿಯಿಂದ

ಒಳನುಗ್ಗಿ 

ಕ್ಷಣಕೊಂದು ಬದಲಾಗುವ

ಕಪ್ಪು-ಬಿಳುಪು 

ಚಿತ್ತಾರವ 

ಕೋಣೆಯೊಳು ಚೆಲ್ಲಿ

ಮುದಕೊಡುವನು

ಶಶಿ ಈ 

ಮುಸ್ಸಂಜೆ!

******************************

  13.
     ನಲ್ಲನ ಬರವನ್ನೇ ಕಾಯುತ್ತಿರುವ

ನಲ್ಲೆಯ ಗಲ್ಲಕ್ಕೆ ರಂಗನ್ನು ಮೆತ್ತಿ 

ನಲ್ಲನಿಗೆ ಮತ್ತೇರಿಸುವ ಮುಸ್ಸಂಜೆ!

*****************************

   14.
    ದಿನದ ಪಾಳಿ ಮುಗಿಸಿ

ರಂಗಮಂಟಪದ ಪರದೆಯ ಜಾರಿಸಿ

ಅತ್ತ ರವಿ ಸರಿದನು!

ಇತ್ತ ಝಗಮಗಿಸುವ ಬೆಳಕಿನಲ್ಲಿ

ಹೊಸ ಆಟ ತೋರಲು

ತೆರೆ ಮೇಲೇರಿಸಲು ಕಾದಿರುವ

ನಿಶೆಗೆ ಸ್ವಾಗತ ಕೋರುತಿಹಳು

ಸಂಧ್ಯೆ!

***********************************

   15.
    ಬೆಳ್ ಬೆಳದಿಂಗಳು

ಮಿನುಗುವ ಚುಕ್ಕಿ 

ಮಲ್ಲಿಗೆಯ ಕಂಪು

ಸಾಕಲ್ಲವೆ; ಅದೋ

ಕೇಳುತ್ತಿದೆಯೇ ಮುಸ್ಸಂಜೆ,

ನನ್ನೆದೆಯೊಳಗಿನ ಭಾವ

ಗೆಜ್ಜೆಯ ನಾದ!

*************************

   16.

    ದಿನದ ಧಾವಂತದ ಓಟಕೊಂದು ಅಲ್ಪ ವಿರಾಮವಿತ್ತು

ಈ ಹೊಂಬೆಳಕಿನ ಮುಸ್ಸಂಜೆಯಲ್ಲಿ

ಬಾಲ್ಯದ ಸವಿನೆನಪಿನ ಸಿಹಿ ಮೆಲ್ಲುತ್ತಾ

ಚಾ ಕುಡಿಯುವ ಸಂಜೆ!

***************************

  17.
     ಮನದ ಕೊಳದೊಳು ಇಣುಕಿ 

ತನ್ನ ಬಿಂಬವನಲ್ಲಿ ಚೆಲ್ಲಿ 

ಹೆಪ್ಪುಗಟ್ಟಿದ ಭಾವವ ಕರಗಿಸಿ 

ಖುಷಿ ತರುವ ಶಶಿ!

ಮುಸ್ಸಂಜೆ ಮೂಡಿತೀ ಪರಿಯಲಿ!

***********************************

   18.
    ಅಲ್ಲೂ ಕತ್ತಲು

ಇಲ್ಲೂ ಕತ್ತಲು

ಅಲ್ಲಿ ಶಶಿಯ ಉದಯ

ಇಲ್ಲಿ ಒಲವಿನ ಉದಯ

ನಮ್ಮ ಬದುಕಿಗೆ 

ಮುಸ್ಸಂಜೆಯ ಕಾಣಿಕೆ!

*************************

   19.
    ತವರು ಮನೆಯಿಂದ ಕೇಳಿ ಬಂದ ತಾಳದ ನಾದ

ನೆರೆಮನೆಯಿಂದ ತೇಲಿ ಬಂದ ಅಗರುಬತ್ತಿಯ ಗಂಧ

ಮೇಲಿನರಮನೆಯಿಂದ ಚೆಲ್ಲುವ ತಿಂಗಳ ಬೆಳಕು

ಅನುರಾಗ ಹೊಮ್ಮಿಸುತ್ತಿರುವ ಬಾನ ತಾರೆಯರು

ಆಹಾ! ಎಂತಹ ಸೊಬಗಿನ ಮುಸ್ಸಂಜೆಯಿದು!

***************************************

 20.
      ಹಗಲೆಲ್ಲಾ ಅವನ ಸಂದೇಶಗಳ ನಿರೀಕ್ಷೆಯಲ್ಲೇಕಳೆಯಿತು...

ಹ್ಞೂಂ, ಸುಳಿವೇ ಇಲ್ಲ...

ಜತೆ ಕೊಟ್ಟ ಭಾನು ಬೆನ್ನು ಹಾಕಿ ನಡೆದೇ ಬಿಟ್ಟ...

ಸುಕುಮಾರಿ, ನಾನಿರುವಿನೇ ನಿನ್ನ ಜತೆ...

ಅನ್ನುತಲೇ ತೇರನೇರಿ ಕುಳಿತು ನಲ್ಲೆಯ

ಮಾತುಗಳಿಗೆ ಕಿವಿಯಾದ ಶಶಿ...

ಮುಸ್ಸಂಜೆಯಲಿ ಹೊಮ್ಮಿತು ವಿರಹ ಮನದ ಕಾವ್ಯ!

*****************************************

 21.
      ನಕ್ಷತ್ರಗಳ ಪಡೆಯ ನಡುವೆ ಹೊಳೆಯುವ ಬಿದಿಗೆ ಚಂದಿರನೇ,

ಒಯ್ಯೋ ನನ್ನೀ ಕಾವ್ಯವ ಅತ್ತ ಅವಳೆಡೆ..

ಕಾದಿರುವಳು ಆಕೆ ದಿನವಿಡೀ...

ಅದೇಕೋ ಇಂದೇ ಮಲಗಿದೆ ಅಡ್ಡ ಜಂಗಮವಾಣಿ...

ಒಂದಿಷ್ಟು ಪುಣ್ಯ ಕಟ್ಟಿಕೋ...

ನನ್ನೆದೆಯ ಭಾವವೇ ಹರಿದಿದೆ... 

ಒಲುಮೆಯ ಕಾವ್ಯದ ಓಲೆಯಾಗಿ...

ಕಣ್ಣಾಡಿಸಬೇಡ... ನಗಬೇಡ...

ನಾ ಕಾಳಿದಾಸನೂ ಅಲ್ಲ,

ನಾ ಕೆ.ಎಸ್ ನರಸಿಂಹ ಸ್ವಾಮಿಯೂ ಅಲ್ಲ...

ನಾ ಕೇವಲ ಹುಚ್ಚ...

ನನ್ನೊಲುಮೆಯ ದಾಸ...

ಅದರರಿವಿದೆ ಅವಳಿಗೆ..

ನನಗಷ್ಟು ಸಾಕು...

ಇನ್ನೇನು ಬೇಕು 

ವಿರಹಿ ಪ್ರೇಮಿಗೆ!

ಈ ಮುಸ್ಸಂಜೆಯಲಿ ಮೂಡಿದ ವ್ಯಾಲಂಟೈನ್ ಗೀತೆ!

**********************************************

  22.
     ದಿನದ ಪಾಳಿ ಮುಗಿಸಿ

ರಂಗಮಂಟಪದ ಪರದೆಯ ಜಾರಿಸಿ

ಅತ್ತ ರವಿ ಸರಿದನು!

ಇತ್ತ ಝಗಮಗಿಸುವ ಬೆಳಕಿನಲ್ಲಿ

ಹೊಸ ಆಟ ತೋರಲು

ತೆರೆ ಮೇಲೇರಿಸಲು ಕಾದಿರುವ

ನಿಶೆಗೆ ಸ್ವಾಗತ ಕೋರುತಿಹಳು

ಸಂಧ್ಯೆ!

********************************************

  23.
     ಸ್ಫೂರ್ತಿ ಪಡೆಯಲೆಂದು ನೆಟ್ಟೆ ದೃಷ್ಟಿ ಬಾನಿನತ್ತ...

ಮಿಣುಕು ತಾರೆಯರ ನಡುವೆ ಕಾಣಿಸಿತು ಅವನ ಬಿಂಬ...

ನವಿರಾದ ಕಂಪನ ನನ್ನೊಳಗೆ... 

ಮನ ಬಿಚ್ಚಿ ನಾ ಹಾಡಿದೆ...

ಮಾಮರದಿ ಕುಹೂ ಕುಹೂ ಗಾನವೂ ಮಾರ್ದನಿಸಿತು...

ಅಪೂರ್ವ ಅನುಭೂತಿಯನಿತ್ತು ಮುದವಿತ್ತ  ಮುಸ್ಸಂಜೆ!

****************************************

   24.
    ವಸಂತನ ಆಗಮನದ ಸಂಭ್ರಮವೆಲ್ಲೆಡೆ

ಹೊಸ ಚಿಗುರು ಸುತ್ತಮುತ್ತ

ಹಕ್ಕಿಗಳ ಚಿಲಿಪಿಲಿ ಗಾನ

ಹೊಸ ಲಹರಿ ಎದೆಯೊಳಗೆ

ಪೂರ್ಣ ಚಂದಮನ ನೋಟ

ಕಡು ನೀಲಿ ಆಗಸದಲಿ 

ತಂಪೆರೆಯಿತು ಆರ್ದ ಮನಕೆ

ಹೊಸ ಪಲ್ಲವಿ ಹಾಡಿತು

ನಲ್ಲೆಯ ಮನ ಈ 

ಮುಸ್ಸಂಜೆಯಲಿ!

******************************

  25.
     ||ಮಾಮರದ ಮೇಲೊಂದು ಕೋಗಿಲೆ||

||ನದಿತೀರದ ಕಲ್ಲ ಮೇಲೊಂದು ಕೊಳಲು||

||ಆ ಕಾಮನ ಬಿಲ್ಲ ಮೇಲೊಂದು ನಲ್ಲನ ಬಿಂಬ||

||ಈ ನಲ್ಲೆಯ ನಾಸಿಕದ  ಮೇಲೊಂದು ನತ್ತು||

||ಕಡುನೀಲಿ ನಭದ ಮೇಲೊಂದು ಬೆಳ್ಳಿ ಬಟ್ಟಲು||

     ||ಈ ಹುಣ್ಣಿಮೆ ರಾತ್ರಿಯಲೊಂದು ರಾಸಕ್ರೀಡೆ||

     ||ಈ ಮುಸ್ಸಂಜೆಯಲೊಂದು ಮಧುರ ರಸ ಕಾವ್ಯ||

************************

26.
ಕತ್ತಲೆಯ ಗರ್ಭವನು ಸೀಳಿ ಕುಲು ಕುಲು ನಗುವ ಚುಕ್ಕಿಗಳು

ಮೋಡದ ಮರೆಯಲಿ ಅಡಗಿ ನಲ್ಲೆಯ ಓಲೆಯನೋದುವ ಚಂದಿರ

ಗೂಡಿಗೆ ಮರಳಿದ ಹಕ್ಕಿಗಳ ಮೌನ ಜೋಗುಳ

ಮುಂಗುರುಳ ಜತೆ ಆಟವಾಡುತ್ತ ನಲ್ಲನ ಸಂದೇಶ ಪಿಸುಗುಟ್ಟುವ ತಂಗಾಳಿ

ಅಪ್ಪಿ ಹಿಡಿದ ಮುದ್ದು ಸೊಸೆಯ ಎಂಜಲಿನ ಅಭಿಷೇಕ ಗಲ್ಲಕ್ಕೆ

ಆಹಾ! ಸವಿ ಸವಿ ಮುಸ್ಸಂಜೆ!

**********************************

27.ಹಲವು ಹಂಬಲಗಳ ತರುವ ಶಶಿಯ ತೋರುವ ಮುಸ್ಸಂಜೆ!

___________________________________

ತಲೆಯೆತ್ತದೆ ನಡೆದವಳ ಕೆಣಕಿ ಪ್ರಶ್ನಿಸಿದ...

"ಅದೇನೆ ಇಂದು ಬರೆಯಲು ಸ್ಫೂರ್ತಿ ಬೇಡವೆ! ಇಂದೇಕೆ ನೋಟವಿಲ್ಲವಿತ್ತ?"

"ನನ್ನಲ್ಲಿ ಹುಟ್ಟಿಸುವೆ ನೀ ಹಲವು ಹಂಬಲಗಳನು..

ನಿನ್ನ ತೋರುತಾ ರಾಮನಿಗೆ ಉಣಿಸುವ ಕೌಸಲ್ಯೆಯಾಗುವಾಸೆ,

ಬೆಳದಿಂಗಳಲ್ಲಿ ರಾಧೆಯಾಗಿ ಕೃಷ್ಣನೊಡನೆ ಯಮುನಾತೀರದಲಿ ಕೋಲಾಟವಾಡುವಾಸೆ,

ಕೈಲಾಸಗಿರಿಯಲಿ ಶೈಲಜೆಯಾಗಿ ಪರಮೇಶನ ಸೇವೆಮಾಡುವಾಸೆ,

ಹಕ್ಕಿಯಾಗಿ ಹಾರಿ ನಿನ್ನೂರಿಗೆ ಬರುವಾಸೆ,

ನಿನ್ನ ಮೋಹಕ ಬೆಳಕನ್ನು ಪುಟ್ಟ ಕ್ಯಾನ್ವಾಸಿನಲ್ಲಿ ಬಂಧಿಸುವಾಸೆ,

ಮಿಂಚುವ ಚುಕ್ಕಿಯಾಗಿ ಆಗಸದಲಿ ಮೆರೆಯಬೇಕೆಂಬಾಸೆ... "

ಹಂಬಲಗಳ ಪಟ್ಟಿಯನ್ನು ಕೇಳುತ ಸೋತ ಚಂದಿರ!

ಅವನಿಗೆ ಪಟ್ಟಿಯ ಕೊಡುತ ನಾನೂ ಸೋತ ಮುಸ್ಸಂಜೆ!

 ********************************

28.
ಗೆಜ್ಜೆಯ ಸದ್ದು ಮಾಡುತ್ತಾ

ಬಂದ ಸಂಧ್ಯೆ ಕಣ್ಮುಚ್ಚಿ

ಒಯ್ದಳು ನಲ್ಲನಿರುವ ಚಂದ್ರಲೋಕಕೆ

ತೂಗುಯ್ಯಾಲೆಯಲಿ ಪವಡಿಸಿದ ಅವನ

ಬಾಹುಬಂಧನದಲಿ ಅಡಗಿದೆ ನಾ

ಪಾವನವಾಯಿತು ನನ್ನೀ ಮುಸ್ಸಂಜೆ!

***********************************

ನಲ್ಲನ ಬಾಹುಬಂಧನದಲ್ಲಿ ಕಳೆದ ಮುಸ್ಸಂಜೆ!

ಗೆಜ್ಜೆಯ ಸದ್ದು ಮಾಡುತ್ತಾ

ಬಂದ ಸಂಧ್ಯೆ ಕಣ್ಮುಚ್ಚಿ

ಒಯ್ದಳು ನಲ್ಲನಿರುವ ಚಂದ್ರಲೋಕಕೆ

ತೂಗುಯ್ಯಾಲೆಯಲಿ ಪವಡಿಸಿದ ಅವನ

ಬಾಹುಬಂಧನದಲಿ ಅಡಗಿದೆ ನಾ

ಪಾವನವಾಯಿತು ನನ್ನೀ ಮುಸ್ಸಂಜೆ!

ಹಲವು ಹಂಬಲಗಳ ತರುವ ಶಶಿಯ ತೋರುವ ಮುಸ್ಸಂಜೆ!

ಹಲವು ಹಂಬಲಗಳ ತರುವ ಶಶಿಯ ತೋರುವ ಮುಸ್ಸಂಜೆ!
___________________________________

ತಲೆಯೆತ್ತದೆ ನಡೆದವಳ ಕೆಣಕಿ ಪ್ರಶ್ನಿಸಿದ...
"ಅದೇನೆ ಇಂದು ಬರೆಯಲು ಸ್ಫೂರ್ತಿ ಬೇಡವೆ! ಇಂದೇಕೆ ನೋಟವಿಲ್ಲವಿತ್ತ?"
"ನನ್ನಲ್ಲಿ ಹುಟ್ಟಿಸುವೆ ನೀ ಹಲವು ಹಂಬಲಗಳನು..
ನಿನ್ನ ತೋರುತಾ ರಾಮನಿಗೆ ಉಣಿಸುವ ಕೌಸಲ್ಯೆಯಾಗುವಾಸೆ,
ಬೆಳದಿಂಗಳಲ್ಲಿ ರಾಧೆಯಾಗಿ ಕೃಷ್ಣನೊಡನೆ ಯಮುನಾತೀರದಲಿ ಕೋಲಾಟವಾಡುವಾಸೆ,
ಕೈಲಾಸಗಿರಿಯಲಿ ಶೈಲಜೆಯಾಗಿ ಪರಮೇಶನ ಸೇವೆಮಾಡುವಾಸೆ,
ಹಕ್ಕಿಯಾಗಿ ಹಾರಿ ನಿನ್ನೂರಿಗೆ ಬರುವಾಸೆ,
ನಿನ್ನ ಮೋಹಕ ಬೆಳಕನ್ನು ಪುಟ್ಟ ಕ್ಯಾನ್ವಾಸಿನಲ್ಲಿ ಬಂಧಿಸುವಾಸೆ,
ಮಿಂಚುವ ಚುಕ್ಕಿಯಾಗಿ ಆಗಸದಲಿ ಮೆರೆಯಬೇಕೆಂಬಾಸೆ... "
ಹಂಬಲಗಳ ಪಟ್ಟಿಯನ್ನು ಕೇಳುತ ಸೋತ ಚಂದಿರ!
ಅವನಿಗೆ ಪಟ್ಟಿಯ ಕೊಡುತ ನಾನೂ ಸೋತ ಮುಸ್ಸಂಜೆ!

ಸವಿ ಸವಿ ಮುಸ್ಸಂಜೆ!

ಕತ್ತಲೆಯ ಗರ್ಭವನು ಸೀಳಿ ಕುಲು ಕುಲು ನಗುವ ಚುಕ್ಕಿಗಳು
ಮೋಡದ ಮರೆಯಲಿ ಅಡಗಿ ನಲ್ಲೆಯ ಓಲೆಯನೋದುವ ಚಂದಿರ
ಗೂಡಿಗೆ ಮರಳಿದ ಹಕ್ಕಿಗಳ ಮೌನ ಜೋಗುಳ
ಮುಂಗುರುಳ ಜತೆ ಆಟವಾಡುತ್ತ ನಲ್ಲನ ಸಂದೇಶ ಪಿಸುಗುಟ್ಟುವ ತಂಗಾಳಿ
ಅಪ್ಪಿ ಹಿಡಿದ ಮುದ್ದು ಸೊಸೆಯ ಎಂಜಲಿನ ಅಭಿಷೇಕ ಗಲ್ಲಕ್ಕೆ
ಆಹಾ! ಸವಿ ಸವಿ ಮುಸ್ಸಂಜೆ!

ಈ ಮುಸ್ಸಂಜೆಯಲೊಂದು...

|| ಮಾಮರದ ಮೇಲೊಂದು ಕೋಗಿಲೆ ||

|| ನದಿತೀರದ ಕಲ್ಲ ಮೇಲೊಂದು ಕೊಳಲು ||

|| ಮಳೆಬಿಲ್ಲ ಮೇಲೊಂದು ನಲ್ಲನ ಬಿಂಬ ||

|| ನಲ್ಲೆಯ ನಾಸಿಕದ  ಮೇಲೊಂದು ನಕ್ಷತ್ರ ||

|| ಕಡುನೀಲಿ ನಭದ ಮೇಲೊಂದು ಬೆಳ್ಳಿ ಬಟ್ಟಲು ||

|| ಮನದಂಗಳಲೊಂದು ರಾಧಾ ಕೃಷ್ಣರ ರಾಸಕ್ರೀಡೆ ||

|| ನಲ್ಲಿರುಳಿನಂದು ಮಧುರ ರಸ ಕಾವ್ಯ ||

ಚೈತ್ರ ಮಾಸದ ಮುಸ್ಸಂಜೆ!

...
ವಸಂತನ ಆಗಮನದ ಸಂಭ್ರಮವೆಲ್ಲೆಡೆ
ಹೊಸ ಚಿಗುರು ಸುತ್ತಮುತ್ತ
ಹಕ್ಕಿಗಳ ಚಿಲಿಪಿಲಿ ಗಾನ
ಹೊಸ ಲಹರಿ ಎದೆಯೊಳಗೆ
ಪೂರ್ಣ ಚಂದಮನ ನೋಟ
ಕಡು ನೀಲಿ ಆಗಸದಲಿ 
ತಂಪೆರೆಯಿತು ಆರ್ದ್ರಮನಕೆ
ಹೊಸ ಪಲ್ಲವಿ ಹಾಡಿತು
ನಲ್ಲೆಯ ಮನ ಈ 
ಮುಸ್ಸಂಜೆಯಲಿ!