ಇರುಳಿನ ಕನವರಿಕೆಗಳು..

ಇರುಳಿನ ಅಮಲಿನ ಕನವರಿಕೆ..
-----------------------------

ಅ: ಇರುಳೆಂದರೆ, ನಿದಿರಮ್ಮನ ಲಾಲಿ-ಕನಸುಗಳ ಜೋಕಾಲಿ.. ಶುಭ ರಾತ್ರಿ!

ಆ: ನಿಶೆ ಅರಳಿ ಪಾರಿಜಾತದ ಘಮ ಚೆಲ್ಲಿ, ಬೆರಳಿಗೆ ಬೆರಳು ಬೆಸೆದು ಚುಕ್ಕಿಗಳೂರಿಗೆ ಹೊತ್ತೊಯ್ಯುವ ಸಮಯ. ಶುಭ ಕನಸು.. ಅರಳಲಿ ಮನಸು!

ಗೊರಕೆ ಹೊಡೆಯುವ ನಲ್ಲಿರುಳು!

ಗೊರಕೆ ಹೊಡೆಯುವ ನಲ್ಲಿರುಳು!
----------------------------

ಜೀಂವ್ ಜೀಂವ್..
ಜೀರುಂಡಿನ ಕೂಗು ಆತ್ಮ ಗೆಳತಿಗಾಗಿ

ಟಪ್ ಟಪ್..
ಬೆಳಕಿನ ಒಲವಿಗೆ ಹಂಬಲಿಸುವ ಪತಂಗ

ಕುಲು ಕುಲು..
ನಗುವ ಚುಕ್ಕಿಗಳ ಹಾಸ್ಯ ಗೋಷ್ಠಿ

ಪಿಸಿ ಪಿಸಿ..
ಚಂದ್ರನ ಕಿವಿಯಲಿ ಚಂದ್ರಿಕೆಯ ಬಯಕೆಗಳ ಧಾಳಿ

ಟೊರ್ ಟೊರ್..
ಕಪ್ಪೆಗಳ ಏಕತಾಳ ತಂಬೂರಿ

ಟಣ್ ಟಣ್..
ರಾಧಾ ಮೋಹನರ ಕೋಲಾಟ ನನ್ನಂಗಣದಲ್ಲಿ

ಝಳ ಝಳ..
ನೇತ್ರಾವತಿಯ ಸರಸಾಟ ದಡದಲಿರುವ ಬಿದಿರ ಕೋಲ ಜತೆ

ಜೋಜೋ ಜೋಜೋ..
ನನ್ನ ಹಾಡಿಗೆ ನಲ್ಲಿರುಳಿನ ಲಯಬದ್ದ ಗೊರಕೆ!

ನಲ್ಲಿರುಳು..

ಕತ್ತಲೆಯ ಗರ್ಭವನು ಸೀಳಿ ಕುಲು ಕುಲು ನಗುತ ಕಣ್ಣು ಮಿಟುಕಿಸುವ ಚುಕ್ಕಿಗಳು,
ಮೋಡದ ಮರೆಯಲಿ ಅಡಗಿ ನಲ್ಲೆಯ ಓಲೆಯನೋದಿ ಕೆಂಪೇರುವ ಚಂದಿರ,
ಗೂಡಿಗೆ ಮರಳಿ ಮೌನ ಜೋಗುಳ ಹಾಡುತ ತರುಗಳ ತಬ್ಬಿ ಮಲಗುವ ಪಕ್ಕಿಗಳು,
ಮುಂಗುರುಳ ಜತೆ ಆಟವಾಡುತ್ತ ಅವನ ಸಂದೇಶ ಪಿಸುಗುಟ್ಟುತ ಮುದವೀವ  ತಂಗಾಳಿ,
ಅಂಗೈಯಲಿ ಮುಸುಮುಸು ನಗುತ ಕಂಪಿನ ನಶೆಯೇರಿಸುವ ಸಂಪಿಗೆ,
ಭಾವಲೋಕದಲಿ ನಲಿದಾಡಿಸಿ ಮಡಿಲಲಿ ಮಲಗಿಸಿ ಲಾಲಿ ಹಾಡುವ ನಲ್ಲಿರುಳು!

ನಿನ್ನೆಯ ನಲ್ಲಿರುಳು...

ನಿನ್ನೆಯ ನಲ್ಲಿರುಳು..
-------------------------

ವಾದ ವಿವಾದ..
ಮಾತಿಗೆ ಮಾತು..

ಕಡು ನೀಲಿರಂಗಿನವಳು ಕೆಂಪು 
ಹೊನ್ನ ರಂಗಿನವಳು ಕಪ್ಪು

ಬಾಹುಗಳ ಅಪ್ಪುಗೆ ಸಡಿಲು
ಕಣ್ಣೆವೆಗಳು ಮುಷ್ಕರ ಹೂಡಲು

ಬಿದಿಗೆ ಚಂದ್ರಮ ಸಾಕ್ಷಿಯಲ್ಲ
ಒಂಟಿಯಾಗಿ ಬಿಡಲೊಪ್ಪಲಿಲ್ಲ
ಕ್ಷಣ ಮಾತ್ರದಲಿ ತಲುಪಿದಳಲ್ಲ

ತೂಗುಮಂಚದಲಿ ಬೆಳದಿಂಗಳು
ಅವಳ ಕಾಲ್ಬುಡದಲಿ ಇವಳು
ಚುಕ್ಕಿಗಳ ವಾತ್ಸಲ್ಯ ಹೊದಿಕೆಯು 

ಮುಗಿಲ ಪಲ್ಲಕ್ಕಿಯಲಿ ನಲ್ಲಿರುಳು 
ಚಂದ್ರಮನ ಮಧ್ಯಸ್ಥಿಕೆ
ಮಡುಗಟ್ಟಿದ ಕಪ್ಪು ಕಂಗಳು
ಆಕ್ಷೇಪದ ಹನಿ ಜಾರುತಿರೆ

ನೋಟ ಸೋಲನೊಪ್ಪಿತು
ಕಣ್ಣೆವೆಗಳು ಮುಚ್ಚಿದವು
ಬಿಂಬವನು ಅಡಗಿಸಿದವು!

ಹೊತ್ತು ಹದವಾಗಿದೆ..

ಒಲವೇ,

ಹೇಗೆ ಹೇಳಲಿ ನಿನಗೆ

ಹೇಳಲಾಗದಿರದು ನನಗೆ

ಹೊತ್ತು ಹದವಾಗಿದೆ||

ಹತ್ತು ನೂರು ಚುಕ್ಕಿಗಳು

ಹೊಳೆವ ಚಂದಮನೂ

ಹೊತ್ತು ಹದವಾಗಿದೆ||

ಹಗಲು ಮಂಟಪಕೆ

ಹೊದಿಸಿ ಕಪ್ಪು ಪರದೆ

ಹೊತ್ತು ಹದವಾಗಿದೆ||

ಹೊಳೆವ ಕಣ್ಣು

ಹಾಯಾಗಿ  ಅಡಗಿವೆ

ಹೊತ್ತು ಹದವಾಗಿದೆ||

ಹೆಜ್ಜೆ ಸದ್ದು ಆಲಿಸು

ಹೊರಗೆ ಬಂದುಬಿಡು

ಹೊತ್ತು ಹದವಾಗಿದೆ

ಹಾಯಾಗಿ ಮಡಿಲಲಿ

ಹಗುರವಾಗಿ ಮನಸಿನಲಿ

ಹೊತ್ತು ಹದವಾಗಿದೆ ||

ಹರಯ ಮರಳಿತು

ಹಚ್ಚಹಸಿರು ತುಂಬಿತು

ಹೊತ್ತು ಹದವಾಗಿದೆ ||

ನಲ್ಲಿರುಳಿನ ಮೌನ ಗಾನ..

ನಲ್ಲಿರುಳಿನ ಮೌನ ಗಾನ..
--------------------------

ದೂರದಲ್ಲಿ ಒಂಟಿ ಶ್ವಾನದ ಗೋಳು..
ಸಂಗಾತಿಯ ಅಗಲಿಕೆಯ ನೋವು

ನಭದಲಿ ಚುಕ್ಕಿಗಳೂ ಮಂಕು..
ಶಶಿಯನಾವರಿಸಿದೆ ಪರದೆ ಕರಿಕಪ್ಪು

ಅಂಗಣದಲಿನ್ನೂ ಉರಿಯುತಿದೆ  ದೀಪ..
ಮನೆಯೊಡೆಯನಿನ್ನೂ ಮರಳಿಲ್ಲದ ಸಂಕೇತ

ಕಿಟಿಕಿಗೊರಗಿದ  ಹಸಿರು ಕಂಕಣಗಳಿಗಿಲ್ಲ
ಮೆಚ್ಚಿಸುವ ಕಿಂಕಿಣಿ  ಭಾಗ್ಯವಿಲ್ಲ

ನಿಟ್ಟುಸಿರಿಗೆ ಕರಗುತಿದೆ ಮಂಜು..
ಅಳಲು ಹರಿದು ಒದ್ದೆಗಣ್ಣು

ನಲ್ಲಿರುಳಿಗೂ ಅವನದೇ ಧ್ಯಾನ
ಹಾಡುತಿದೆ ಮೌನ ಗಾನ!

8. ಯಾರ ಕಣ್ಣಲಿ ಯಾರ ಬಿಂಬ..



ಬಲವಾಗಿ ಅಪ್ಪಿ ಹಿಡಿದ ನೈದಿಲೆಯ ರೆಪ್ಪೆಗಳ ಪುಸಲಾಯಿಸಿ ಮೆಲ್ಲನೆ ತೆರೆದು
ಅಲ್ಲಿ ಮಿಂಚುವ ತನ್ನ ಬಿಂಬ ಕಂಡು ಮೆರೆವ ಆಸೆ ಪೂರ್ಣ ಚಂದಿರನಿಗೆ;

ಕಡುನೀಲಿ ಸೀರೆಗೆ ಅಲ್ಲಲ್ಲಿ ಹೊಳೆವ ಬೆಳ್ಳಿ ಟಿಕಲಿಗಳನಂಟಿಸಿ
’ಘಲ್ ಘಲ್’ ನಾದದೊಂದಿಗೆ ವಯ್ಯಾರದಿ ಬರುವ ನಲ್ಲಿರುಳಿಗೆ
ಪೂರ್ಣ ಚಂದಿರನ ಕಣ್ಣಲ್ಲಿ ತನ್ನ ಕಪ್ಪುಬಿಂಬ ಕಾಣುವಾಸೆ;

ಕಣ್ಮುಚ್ಚಿ ಕಲ್‍ಬೆಂಚಮೇಲೆ ಕಲ್ಪನೆಯ ಲೋಕದಲಿ ಕಳೆದುಹೋದವಳು
ನಲ್ಲಿರುಳು-ಚಂದಿರನ ಒಲವಿನ ಕಣ್ಣಾಟವನು ಕಂಡು ಮುಗುಳುನಗುತ್ತಾ
ಕಣ್ದೆರೆದಾಗ ಲೋಕ ಕಂಡಿತು ಅವಳೊಲವಿನ ಬಿಂಬ ಅವಳ ಕಣ್ಣಲಿ!

ನಲ್ಲಿರುಳಿನಲೊಂದು ಕತೆ..

ನಲ್ಲಿರುಳಿನಲೊಂದು ಕತೆ..
-----------------------

“ಒಂದೂರಿನಲ್ಲಿ.. “
ಪಾರಿಜಾತದ ಬುಡದಲಿ ತುತ್ತುಣಿಸುತ್ತಾ
ಬಿಚ್ಚಿಕೊಳ್ಳುವ ಚುಕ್ಕಿಯ ಕತೆ..
ನಡುನಡುವಿನಲಿ ತಲೆದೂಗುವ
ಮರುತನ ಪುಷ್ಪವೃಷ್ಟಿ..

ಘಮಘಮಿಸುವ ಪಾರಿಜಾತಗಳ
ಚುಕ್ಕಿ ಅಮ್ಮನ ಮಡಿಲಲಿ,
ಪುಟ್ಟನ ಗುಂಗುರು
ಮುಂಗುರುಳ ಎಡೆಯಲಿ...
ಜೀರುಂಡೆಗಳ ತಂಬೂರಿ ಝೀಂಕಾರ


“ಓಂ ನಮೋ ವಾಸುದೇವಾಯ.. “
ಮುದ್ದುಗೆ ಬಾಲ ದ್ರುವನ
ತುತ್ತಿನ ಚಿಂತೆ..
ಉಣಿಸುವರ್ಯಾರು, ಹಾಲು ಕೊಡುವವರ್ಯಾರು..
ಕೆಂಪು ಕೊಕ್ಕಿನ
ಹಕ್ಕಿಗಳು ಉಣಿಸಿದವೆಂದರೆ

ಹವಳದ ತುಟಿಯೆಡೆಯಿಂದ
ಇಣುಕುವ ದಾಳಿಂಬೆಬೀಜಗಳ ನಗು..
“ಅಮ್ಮ, ಚಂದಮಾಮಂಗೂ.. “
ಅಡ್ಡದಿಡ್ಡಿಯಾಗಿ ಸಾಗುವ ಕತೆಯೊಂದಿಗೆ
ತುತ್ತುಂಡ ನಲ್ಲಿರುಳಿಗೂ
ಚುಕ್ಕಿಯಾದ ಕನಸಿನ ಸುಖ ನಿದ್ದೆ!


(ಇಪ್ಪತ್ತು ವರ್ಷಗಳ ಹಿಂದಿನ ನೆನಪಿನಲಿ.. ನನ್ನ ಪಿಕಾಸುವಿನ ಬಾಲ್ಯ)

ಪುಟ್ಟಿ ಮತ್ತು ಚಂದಮಾಮನ ಹಲ್ಲು!

ಪುಟ್ಟಿ ಮತ್ತು ಚಂದಮಾಮನ ಹಲ್ಲು!
--------------------------------

ಚುಕ್ಕಿಗಳ ಜತೆ ಗೆರೆಗಳನೆಳೆದು
ಕುಂಟೆ ಬಿಲ್ಲೆಯನಾಡುತಿದ್ದ  ಚಂದಮಾಮ
ನುಣುಪಾದ ಚಿಕ್ಕ ಚುಕ್ಕಿಯೊಂದನೆಡವಿದನು
ಬಿದ್ದು ಹಲ್ಲು ಮುರಿದುಕೊಂಡನು;

ಚುಕ್ಕಿ ಚಂದಮಾಮಂದಿರ ದೊಂಡೆಗೆ
ನಿದ್ದೆಯಿಂದದೆಚ್ಚರವಾದ ಪಕ್ಕಿಗಳೆಲ್ಲ ನಕ್ಕ
ಕಿಲ ಕಿಲ ಸದ್ದು ಮುಗಿಲ ತುಂಬಾ
ಮಾರ್ದನಿಸಿ ನನ್ನ ಪುಟ್ಟಿಯನೆಬ್ಬಿಸಿತು;

ಅಂಗಣಕೆ ಬಂದು ಮುಗಿಲತ್ತ
ಚಾಚಿದ ಪುಟ್ಟಿಯ ಪುಟ್ಟ ಗುಲಾಬಿ ಕೈ
ಮುಷ್ಟಿಯಲಿ ಚಂದಮಾಮನ ಹಲ್ಲಿನ
ತುಂಡು ಭದ್ರವಾಗಿ ಅಡಗಿತು;

ನಾಳೆ ಪುಟ್ಟಿ ತನ್ನ ಪುಟ್ಟ
ಗೆಳೆಯ ಗೆಳತಿಯರಿಗೆ ಹೇಳುವ
ನಲ್ಲಿರುಳಿನ ಕತೆಗೆ ಸಾಕ್ಷಿಯಾಯಿತು!


(ಹದಿನೆಂಟು ವರ್ಷಗಳ ಹಿಂದಿನ ದಿನದ ನಲ್ಲಿರುಳ ನೆನಪಿನಲಿ ಮೂಡಿದ ಬರಹ.. )

ನಲ್ಲಿರುಳಿಗೂ ಸವಿ ನಿದ್ದೆ..

“ಒಂದೂರಿನಲ್ಲಿ.. “

ಪಾರಿಜಾತದ ಬುಡದಲಿ ತುತ್ತುಣಿಸುತ್ತಾ ಬಿಚ್ಚಿಕೊಳ್ಳುವ ಚುಕ್ಕಿ ಕತೆ..

ನಡುನಡುವಿನಲಿ ತಲೆದೂಗಿದ ಮರುತನ ಪುಷ್ಪವೃಷ್ಟಿ..

ಘಮಘಮಿಸುವ ಪಾರಿಜಾತಗಳ ಚುಕ್ಕಿ ಮಡಿಲಲಿ..

ಜೀರುಂಡೆಗಳು ಕಿವಿನಿಮಿರಿಸಿ ಆಲಿಸುತ್ತಿರುವವೇನೋ..

ಹಿತವಾದ ತಂಬೂರಿ ಝೇಂಕಾರ...

“ಓಂ ನಮೋ ವಾಸುದೇವಾಯ.. “

ಮುದ್ದುಗೆ ಬಾಲ ದ್ರುವನ ತುತ್ತಿನ ಚಿಂತೆ..

ಕೆಂಪು ಕೊಕ್ಕಿನ ಹಕ್ಕಿಗಳು ಉಣಿಸಿದವೆಂದರೇ ತೃಪ್ತಿ..

“ಅಮ್ಮ ಚಂದಮಾಮಂಗೂ.. “

ಅಡ್ಡದಿಡ್ಡಿಯಾಗಿ ಸಾಗುವ ಕತೆಯೊಂದಿಗೆ

ಒಂದು ತುತ್ತು ಉಂಡ

ನಲ್ಲಿರುಳಿಗೂ ಸವಿಗನಸಿನ ನಿದ್ದೆ!

ಅವಳ ವ್ಯಥೆ..

ಇನ್ನೂ ಬಿಸಿ ಆರಿಲ್ಲ..

ಅಂದು ಕೈ ಕೈ ಬೆಸೆದು ಹಾಕಿದ

ಏಳು ಹೆಜ್ಜೆಗಳ ನಕ್ಷೆ ಇನ್ನೂ ಹಸಿ..

ತನುಮನಗಳು ಬೆರೆತು ಹಾಲು ಮರೆತು

ಸಜ್ಜೆ ಹೂಗಳು ನಜ್ಜು ನಜ್ಜಾಗಿ

ಲಜ್ಜೆ ಮರೆತ ಇರುಳು ಇನ್ನೆಲ್ಲಿ..

ಉಸಿರಿಗೆ ಉಸಿರು ಬೆರೆತು

ಜೀವ ಜೀವದ ಮಿಲನವೆಲ್ಲ

ಬರೇ ನೆನಪಾಗಿ ಉಳಿಯುವುದಲ್ಲಿ

ಅವಳ ತೆಕ್ಕೆಯಲ್ಲಿದವನ ನೆನಪು

ಮರೆಯಲಾಗದೆ ತಪ್ತಳಾದವಳ

ಕೊಲ್ಲದೆ ಮರಳುವೆಯೇಕೆ ನಲ್ಲಿರುಳೇ!

ನಲ್ಲಿರುಳ ಕವಿತೆ!

ಮುಂಜಾವಿನಲಿ ಸುತ್ತಿಟ್ಟ ಕನಸುಗಳ ಬಿಡಿಸಲು ಕಾದಿದೆ ನಲ್ಲಿರುಳು

ನಭದಲಿದ ಚುಕ್ಕಿಗಳು ಕನಸಿನಂಗಳಕಿಳಿದು ಚಿತ್ತಾರ ಬಿಡಿಸಲು 

ಜತೆಯಾಗಿ ಯುಗಳ ಗೀತೆ ಹಾಡುತ ನಲಿಯುವ ನನ್ನೊಲವು
ಕಣ್ರೆಪ್ಪೆಯೊಳಗಿನ ಆ ಲೋಕಕೆ ಧಾವಿಸಿದೆ ನನ್ನ ಮನವು!

ಏಕೀ ಅವಾಂತರ..

ಕಪ್ಪು ಮುಗಿಲಲಿ ಲಕ್ಷ ತಾರೆಗಳ ನಡುವೆ  ಕಪ್ಪು ಚಂದಿರ..

ಕೌಮುದಿ ಮುನಿದು ತೆರಳಿರುವಳಂತೆ ಬಿಟ್ಟು ಮಂದಿರ

ವಿಶಾಲ ಸುಪ್ಪತ್ತಿಗೆಯಲಿ ಹೊರಳುತ್ತ ನರಳುತ್ತಿರುವ ಕಾಂತ

ತೌರು ಮನೆಗೆ ತೆರಳಿದವಳಿಗೆ ಕಾಡಿಲ್ಲವೇಕೆ ಏಕಾಂತ

ನಲ್ಲಿರುಳಿಗೇಕೆ ಅಚ್ಚರಿ ಏಕೆ, ಯಾಕೆ, ಹೀಗೆ ಈ ಆವಾಂತರ!

ನಲ್ಲಿರುಳು..

ಮುಡಿಯಲಿದ್ದವನು ಮಾಯದಲಿ ಬಾನಿಗೆ ನೆಗೆದವನು

ಚಂದ್ರಿಕೆಯ ಮೋಹ ಜಾಲದಲಿ ಸೆರೆಯಾದನು

ಮುಗಿಲಮರೆಯಲಿ ಮರೆಯಾದ ಇಂದುವಿಗೀಗ ಲಜ್ಜೆ
ಹಂಬಲಿಸಿದವಳಿಗೆ ಹಾಸಿತು ನಲ್ಲಿರುಳು ಸಜ್ಜೆ!

ನಲ್ಲಿರುಳಿನ ಹಾಡು!

|| ಮಾಮರದ ಮೇಲೊಂದು ಕೋಗಿಲೆ ||

|| ನದಿತೀರದ ಕಲ್ಲ ಮೇಲೊಂದು ಕೊಳಲು ||

|| ಮಳೆಬಿಲ್ಲ ಮೇಲೊಂದು ನಲ್ಲನ ಬಿಂಬ ||

|| ನಲ್ಲೆಯ ನಾಸಿಕದ  ಮೇಲೊಂದು ನಕ್ಷತ್ರ ||

|| ಕಡುನೀಲಿ ನಭದ ಮೇಲೊಂದು ಬೆಳ್ಳಿ ಬಟ್ಟಲು ||

|| ಮನದಂಗಳಲೊಂದು ರಾಧಾ ಕೃಷ್ಣರ ರಾಸಕ್ರೀಡೆ ||

|| ನಲ್ಲಿರುಳಿನಂದು ಮಧುರ ರಸ ಕಾವ್ಯ ||