ಆಕಾಶ ಮಲ್ಲಿಗೆ

ಆಕಾಶಮಲ್ಲಿಗೆಯ ಸ್ವಗತ-

’ಅಂಗಣ ತುಂಬಾ ಕಡಲಲೆಯ ನೊರೆಗಳು..

ಕಾಲಿಗಂಟುವ ಮರಳಿನಲಿ ನಲ್ಮೆಯ ಓಲೆಗಳು,

ಹ್ಮ್.. ಅಮವಾಸ್ಯೆಯೇ ಇಂದು,

ಅದಕ್ಕೆಂದೇ ಕಣ್ಮುಚ್ಚಾಲೆ ಆಡುವ ಚೇತಾವಣಿ...

ಚಂದ್ರಿಕೆಯಿಲ್ಲದೆ ಒಂಟಿತನ ಕಾಡುತಿದೆಯೇನೋ...

ಇನ್ನು ಅವಳು ಮರಳುವ ತನಕ ನಾನೇ ಅವನ ಕಣ್ಮಣಿ!’

ಆಕಾಶ ಮಲ್ಲಿಗೆ ಕವಿತೆ!

ಅವಳ ಮಡಿಲಲಿದ್ದವನು ಅದ್ಯಾವ ಮೋಹದ ಸೆಳೆತದಲಿ ಬಾನಿಗೆ ನೆಗೆದನೋ..
ಸಿಂಗಾರಿ ಚಂದ್ರಿಕೆಯ ನೀಳ ತೋಳಿನಲಿ ಸೆರೆಯಾದನೋ..
ಮುಗಿಲ ಮರೆಯಲಿ ಮರೆಯಾದ ಇಂದುವಿಗೀಗ ಲಜ್ಜೆ
ಬಿಕ್ಕಳಿಸುತಿಹ ಆಕಾಶಮಲ್ಲಿಗೆಯನು ಸಂತೈಸಿ ಹಾಸಿದಳು ವಸುಂಧರೆ ಸಜ್ಜೆ!