ಈ ಪಯಣ ನಿನ್ನತ್ತಲೇ ನನ್ನೊಲವೇ..

ಈ ಪಯಣ ನಿನ್ನತ್ತಲೇ ನನ್ನೊಲವೇ..
--------------------------

ಮುಳ್ಳುಗಳು ಇಣುಕಿ ಬೆದರಿಸಿ ಚುಚ್ಚುತ್ತಿದ್ದವು ಕಣ್ಗಳಿಗೆ
ಹಾದಿಯುದ್ದಕ್ಕೂ ಹರಡಿದ ಗುಲಾಬಿ ಪಕಳೆಗಳೆಡೆಯಿಂದ

ಪಯಣ ನಿಲ್ಲಿಸುವಂತೆ ಒತ್ತಡ, ಅಬ್ಬರ ಅಲ್ಲಿಲ್ಲಿ..
ಗಾಳಿ ತೇಲಿಸಿ ತಂದ ಒಲವಿನ ಪಿಸುಮಾತುಗಳಲಿ
ಖಳನಾಯಕರ ಅಟ್ಟಹಾಸದ ಮಾರುಲಿಯೂ..

ಅನುಮಾನ, ಹತಾಶೆ, ಹೆದರಿಕೆ..
ಬೇತಾಳದಂತೆ ಬೆನ್ನ ಏರಿ ಮನ ಭಾರ..
ಶಪಥ ತೊಟ್ಟು ಬಿಡದೆ ಚೆಂಡಾಡಿದವು..
ಕನಸುಗಳು ಚಿಂದಿಚೂರು, ರಸ್ತೆಪಾಲು..

ಹ್ಮುಂ! ಸಿಂಹಿಣಿ ನಾನು ಹಿಮ್ಮೆಟ್ಟುವೆನೆ..
ತೊಟ್ಟೆನೀಗ ರಕ್ಷಾಕವಚ
ಹೊರಟೆ ಮತ್ತೆ ಒಲವಿನತ್ತ..

ಒಲವಿನ ಜಪವ ಬಿಟ್ಟು ನಾನುಳಿಯಲಾರೆ
ಲೋಕ ಅಪವಾದಕೆ ನಾ ಬೆಲೆಕೊಡಲಾರೆ!