ಅರಿವು..

ಅರಿವನು ಅರಿವ ಅವಸರದಲಿ ಅಲ್ಲಿಲ್ಲಿ ಅಲೆಯಬೇಡ
ಅಂತರಂಗದಲಿ ಅವನತ್ತ ಅನುರಾಗದ ಅನುಭಾವ
ಅನನ್ಯತೆಯ ಅನುಬಂಧದ ಅನುಭವ ಅರಿವಾದರೆ
ಅದೇ ಅರಿವು, ಅನ್ನುವಳಯ್ಯ ಅವನ ಅವಳು||

ನಿನ್ನೆಯ ನಲ್ಲಿರುಳು...

ನಿನ್ನೆಯ ನಲ್ಲಿರುಳು..
-------------------------

ವಾದ ವಿವಾದ..
ಮಾತಿಗೆ ಮಾತು..

ಕಡು ನೀಲಿರಂಗಿನವಳು ಕೆಂಪು 
ಹೊನ್ನ ರಂಗಿನವಳು ಕಪ್ಪು

ಬಾಹುಗಳ ಅಪ್ಪುಗೆ ಸಡಿಲು
ಕಣ್ಣೆವೆಗಳು ಮುಷ್ಕರ ಹೂಡಲು

ಬಿದಿಗೆ ಚಂದ್ರಮ ಸಾಕ್ಷಿಯಲ್ಲ
ಒಂಟಿಯಾಗಿ ಬಿಡಲೊಪ್ಪಲಿಲ್ಲ
ಕ್ಷಣ ಮಾತ್ರದಲಿ ತಲುಪಿದಳಲ್ಲ

ತೂಗುಮಂಚದಲಿ ಬೆಳದಿಂಗಳು
ಅವಳ ಕಾಲ್ಬುಡದಲಿ ಇವಳು
ಚುಕ್ಕಿಗಳ ವಾತ್ಸಲ್ಯ ಹೊದಿಕೆಯು 

ಮುಗಿಲ ಪಲ್ಲಕ್ಕಿಯಲಿ ನಲ್ಲಿರುಳು 
ಚಂದ್ರಮನ ಮಧ್ಯಸ್ಥಿಕೆ
ಮಡುಗಟ್ಟಿದ ಕಪ್ಪು ಕಂಗಳು
ಆಕ್ಷೇಪದ ಹನಿ ಜಾರುತಿರೆ

ನೋಟ ಸೋಲನೊಪ್ಪಿತು
ಕಣ್ಣೆವೆಗಳು ಮುಚ್ಚಿದವು
ಬಿಂಬವನು ಅಡಗಿಸಿದವು!

ಗಂಧದಲದ್ದಿದ ಅಕ್ಷರಗಳ ಸಾಲು..

ಒಲವೇ,

ಇಷ್ಟು ದಿನಗಳಿಂದ ಕಪ್ಪಿರುಳು  

ರೇಗಿಸಿ ಅಳಿಸಿ ರೆಪ್ಪೆ ಹಚ್ಚಲು

ಬಿಡದೆ ತೋರಿಸಿ ಕಾಡಿಸಿದ

ಖಾಲಿ ಕಾಗದದ ರಾಶಿಯಲ್ಲೀಗ

ಗಂಧದಲದ್ದಿದ ಅಕ್ಷರಗಳ ಸಾಲು

ನಿನ ಹೆಸರಿಗೇ ಹೆಚ್ಚು ಪಾಲು!

ನಿನದೇ ಬಿಂಬ..

ಒಲವೇ,

ಇಷ್ಟು ಕಾಲ ನಲ್ಲಿರುಳು  

ರೇಗಿಸಿ ಅಳಿಸಿ ಕಾಡಿದ

ಖಾಲಿ ಕಾಗದಲ್ಲೆಲ್ಲಾ  ಈಗ

ಬರೇ ನಿನದೇ  ಬಿಂಬ!

ಪ್ರತೀಕಾರ..

ಒಲವೇ,

ಮೌನ ಘಳಿಗೆಗಳ ಪ್ರತೀಕಾರವಿದು

ಎಲ್ಲಿಂದಲೋ ತಂದಿದೆ ಕದ್ದು

ಕಿವಿಗಪ್ಪಳಿಸುತಿದೆ ಈಗ ಮಾತು

ಸಾಗರವಾಗಿ ಭೋರ್ಗರೆಯುವ ಸದ್ದು!

ಅಮರವಾಗಿಲ್ಲವೇಕೆ..

ಒಲವೇ,

ಸಗ್ಗ ಸೃಷ್ಟಿಸಿದ ಘಳಿಗೆಯದು

ಉಳಿಯಲಿಲ್ಲವೇಕೆ ಅಮರವಾಗಿ!

ಭೀಮ ಬಾಹುಗಳ ಗಟ್ಟಿ ಅಪ್ಪುಗೆಯದು

ಉಳಿಯಲಿಲ್ಲವೇಕೆ ಬಿಗಿಯಾಗಿ!

ವಿಧಿಯ ಸಂಚು ಫಲಿಸಲಿಲ್ಲ..

ಒಲವೇ,

ಅದ್ಯಾವಾಗ ನಿನಗೆ ಸಿಕ್ಕಿತು

ನಿನ್ನ ಬೆರಳಲ್ಲೀಗ ಮಿಂಚಿತು

ಫಲಿಸಲಿಲ್ಲ ವಿಧಿಯ ಸಂಚು

ನೆನಪಿನ ಸಂಪತ್ತು ಮರಳಿತು!

ಹೊತ್ತು ಹದವಾಗಿದೆ..

ಒಲವೇ,

ಹೇಗೆ ಹೇಳಲಿ ನಿನಗೆ

ಹೇಳಲಾಗದಿರದು ನನಗೆ

ಹೊತ್ತು ಹದವಾಗಿದೆ||

ಹತ್ತು ನೂರು ಚುಕ್ಕಿಗಳು

ಹೊಳೆವ ಚಂದಮನೂ

ಹೊತ್ತು ಹದವಾಗಿದೆ||

ಹಗಲು ಮಂಟಪಕೆ

ಹೊದಿಸಿ ಕಪ್ಪು ಪರದೆ

ಹೊತ್ತು ಹದವಾಗಿದೆ||

ಹೊಳೆವ ಕಣ್ಣು

ಹಾಯಾಗಿ  ಅಡಗಿವೆ

ಹೊತ್ತು ಹದವಾಗಿದೆ||

ಹೆಜ್ಜೆ ಸದ್ದು ಆಲಿಸು

ಹೊರಗೆ ಬಂದುಬಿಡು

ಹೊತ್ತು ಹದವಾಗಿದೆ

ಹಾಯಾಗಿ ಮಡಿಲಲಿ

ಹಗುರವಾಗಿ ಮನಸಿನಲಿ

ಹೊತ್ತು ಹದವಾಗಿದೆ ||

ಹರಯ ಮರಳಿತು

ಹಚ್ಚಹಸಿರು ತುಂಬಿತು

ಹೊತ್ತು ಹದವಾಗಿದೆ ||

ಅವಳಾಡುವ ಮಾತುಗಳೆಲ್ಲ ಕಾವ್ಯ!

ಒಲವೇ,

ಅದೇನು ಮೋಡಿ ಮಾಡಿಬಿಟ್ಟೆ

ಇವಳ ಬದುಕೀಗ ಭವ್ಯ

ಮರುಳಲೀಗ ಆಡುವ ಹುಚ್ಚು

ಮಾತುಗಳಲ್ಲಿ ಕಾಣುವರು ಕಾವ್ಯ 

ಒಲವೇ..

ಒಲವೇ,

ನಿನ್ನಿಂದ ದೂರ ನಡೆಯುವುದೆಂದರೆ
ನನ್ನ ನಾ ಕಳಕೊಂಡಂತೆಯೇ...