ಹೀರೆಕಾಯ ಸಿಪ್ಪೆಯ ಚಟ್ನಿ!

   ದಪ್ಪ ಚರ್ಮದಂತಿರುವ ಹೀರೆಕಾಯಿಯ ಸಿಪ್ಪೆಯನ್ನು ತೆಗೆದೇ ಅದರ ಉಪ್ಕರಿ ಅಥವಾ ಸಾಂಬಾರನ್ನು ತಯಾರಿಸಬೇಕಾಗುತ್ತೆ. ಹೆಚ್ಚಿನವರು ಅದರ ಸಿಪ್ಪೆ ಸತ್ವಯುಕ್ತವಾಗಿದೆ ಎಂದು ಅರಿತರೂ ಹೇಗೆ ಏನು ತಯಾರಿಸಬೇಕೆಂಬ ಅರಿವಿಲ್ಲದೆ ಅದನ್ನು ಬಿಸಾಡಿಬಿಡುತ್ತಾರೆ. ಹಳೆಜಮಾನದವರು ತಂಬಳಿ, ಚಟ್ನಿ ತಯಾರಿಸುತ್ತಾರೆ. ನಮ್ಮ ಅಮ್ಮನೂ ಅದರ ಚಟ್ನಿ ತಯಾರಿಸುತ್ತಾರೆ..ಈವಾಗ ನಾನೂ...ಬೇರೆಯವರು ಚಟ್ನಿಯನ್ನು ಹೇಗೆ ತಯಾರಿಸುತ್ತಾರಪ್ಪಾ ಅಂತ ಕುತೂಹಲದಿಂದ ಗೂಗಲ್ ಮಾಡಿದರೆ ಹತ್ತು ಹಲವು ಬಗೆಯ ನಮೂನೆಗಳು ದೊರೆತರೂ ನಮ್ಮ ಅಮ್ಮನ ಹಾಗೆ ಬೆಲ್ಲ ಹಾಕಿ ಮಾಡುವ ನಮೂನೆ ಕಾಣಲಿಲ್ಲ..ಸರಿ ಹೇಗೂ ಅಡುಗೆ ಅಂತ ಪೋಸ್ಟ್ ಸುರುಮಾಡಿದ್ದೇನಲ್ಲವೆ..ಅದರಲ್ಲಿ ಇದನ್ನೂ ಹಾಕಿಬಿಡುವ..ಅಲ್ಲದೆ ಇವತ್ತು ಶಿಕ್ಷರ ದಿನಾಚರಣೆ ಅಂತ ಕಾಲೇಜಿನಲ್ಲಿ ಏನೋ ಸಮಾರಂಭವಿರುವುದರಿಂದ ರಜೆನೂ ಇದೆ...

ಚಿತ್ರ ಕೃಪೆ: ಅಂತರ್ಜಾಲ

ಚಿತ್ರ ಕೃಪೆ: ಅಂತರ್ಜಾಲ

ಸಾಮಾಗ್ರಿಗಳು:
ಹುಂ, ಹೀರೆಕಾಯಿ ಚಟ್ನಿ ಅಂದ ಮೇಲೆ ಹೀರೆಕಾಯಿ ಬೇಕೇ ಬೇಕಲ್ವಾ...
ಚಿಟಿಕೆ ಹಿಂಗು
ರುಚಿಗೆ ತಕ್ಕಷ್ಟು ಬೆಲ್ಲ
ತೆಂಗಿನಕಾಯಿ ತುರಿ ( ನಾಲ್ಕೈದು ಚಮಚ)
ಕೆಂಪು ಮೆಣಸಿನಕಾಯಿ( ೪,೫)
ಹುಣಸೆ ಹಣ್ಣು
ಉಪ್ಪು
ತಯಾರಿಕಾ ವಿಧಾನ:
ಮೊದಲು ಸಿಪ್ಪೆಯನ್ನು ಹುರಿದು ಬಾಡಿಸಿಕೊಳ್ಳಿ. ಸಿಪ್ಪೆ ಇದೆ ಅಂತ ತುಂಬಾ ಸಿಪ್ಪೆ ಹಾಕಬೇಡಿ...ರುಚಿ ಕೆಡುತ್ತೆ.  ಹಾಗೆ ಫಿಜ್‍ನಲ್ಲಿ ತೆಗೆದಿಟ್ಟು ಇನ್ನೊಂದು ದಿನ ತಂಬುಳಿ ಮಾಡಿ. ಹಾಗೆಯೇ ತೆಂಗಿನ ತುರಿಯನ್ನು ಒಂಚೂರು ಹುರಿಯಿರಿ. ಹಿಂಗನ್ನು ಎಣ್ಣೆಯಲ್ಲಿ ಒಂದಿಷ್ಟು ಆಚೆ ಇಚೆ ಮಾಡಿ ಹುರಿಯಿರಿ. ನಂತರ ಎಲ್ಲಾ ಸಾಮಾಗ್ರಿಯನ್ನು ಮಿಕ್ಸಿಯಲ್ಲಿ ಹಾಕಿ...ಸ್ವಲ್ಪ ಸ್ವಲ್ಪವೇ ನೀರು ಹಾಕಿ ರುಬ್ಬಿ. ನಯವಾದ ನಂತರ ರುಚಿ ನೋಡಿ, ಉಪ್ಪು, ಬೆಲ್ಲ, ಖಾರ ಬೇಕಾದರೆ ಸೇರಿಸಿ. ನಮ್ಮ ಮನೆಯಲ್ಲಿ ಒಂದಿಷ್ಟು ಖಾರ ಹೆಚ್ಚು ಬೇಕು..ನಿಮ್ಮ ನಿಮ್ಮ ಮನೆಯವರ ರುಚಿ ನೋಡಿ ತಯಾರಿಸಿ. ಇವತ್ತು ನಮ್ಮ ಮನೆಯಲ್ಲಿ ಹೀರೆಕಾಯಿ ಚಟ್ನಿ...ನನಗೆ ತುಂಬಾನೆ ಇಷ್ಟ! ನಾಲಗೆಗೂ ರುಚಿ, ಜೀವಕ್ಕೂ ಹಿತ!