ಕಬೀರ-ದೋಹಾ! ಅನುವಾದ

ರಭಸದಿ ತಿರುಗುತಿದೆ ಬೀಸುಗಲ್ಲು, ಕಬೀರನ ಕಣ್ಣಲ್ಲಿ ನೀರು

ಅಯ್ಯೋ, ದ್ವಂದ್ವ ಚಕ್ರಗಳೆಯಡೆಯಲಿ ಬದುಕು ನುಚ್ಚುನೂರು!

ದಪ್ಪ ದಪ್ಪ ಗ್ರಂಥಗಳನು ಅರೆದು ಮಿದುಳಿಗೆ ತಿಕ್ಕಿದರೂ ಆಗಲಿಲ್ಲ ಪಂಡಿತ

ಅರಿತರೆ ಸಾಕಿತ್ತು, ಒಲವೆಂಬ ಮೂರು ಅಕ್ಷರಗಳ ಮಹಿಮೆ ಕಿಂಚಿತ್!

ಒಲವಿನ ಮತ್ತೊಂದು ನಡೆ...ಆಕಾಶವಾಣಿ ಮಂಗಳೂರು

ಮತ್ತೆ ಮತ್ತೆ ಮಾರ್ದನಿಸುವೆ!

ಒಲವೇ,

ನನಗಿದರ ಅರಿವಿದೆ ಕಣೋ,

ನೀನೊಂದು ಮಹಾ ಪರ್ವತ

ಮತ್ತು ನಿನ್ನ ಕರೆದಾಗಲೆಲ್ಲ

ಮತ್ತೆ ಮತ್ತೆ ಮಾರ್ದನಿಸುವೆ!

ಒಲವು ಮತ್ತು ತಿರುವಿನ ಹಾದಿ!

ಒಲವೇ,

ತಿರುವಿನ ಹಾದಿಯಲಿ ನಾವು ಎದುರುಬದುರಾದೆವು

ನಮ್ಮ ಹೆಜ್ಜೆಗಳು ಸದ್ದಿಲ್ಲದೆ ಜತೆಗೂಡಿದವು.

ಅದೊಂದು ದಿನ ಹಾದಿ ಕವಲೊಡೆಯಿತು,

ಮತ್ತು  ಛಾಯೆಗಳು ಅಲ್ಲೇ ಉಳಿದವು!

ಮೊದಲ ಮಣ್ಣಿನ ಘಮಲು- ನಿನ್ನಿರುವಿನ ಸುಳಿವು!

ಒಲವೇ,

ಅಂದೊಮ್ಮೆ ಹುಡುಕುತ್ತ ನಿನ್ನ

ಅಲೆಯುತ್ತಿದೆ

ಹಾದಿ ಬೀದಿ, ತಿರುವು ಕವಲು

ಅರಸುತ್ತಿದ್ದೆ

ಬೆಟ್ಟ-ಗುಡ್ಡ,  ಗುಡಿ-ಗೋಪುರ

ಲೆಕ್ಕ ಮರೆತು ಹೋಗಿದೆ!

ತಿರುವಿ ಹಾಕಿದ ಹೊತ್ತಗೆಗಳ ಪುಟಗಳು,

ಆಲಿಸಿದ ಮಸ್ತಕಗಳ ಮಾತುಗಳು;

ಸೋತು ಕೈ ಚೆಲ್ಲಿ ಕುಳಿತ

ನನ್ನ ನಾಸಿಕದೊಳಗೆ ನುಸುಳಿದ

ಆಗ ತಾನೆ ಸುರಿದ ಮಳೆಗೆ

ಆರ್ದ್ರವಾದ ಮಣ್ಣಿನ ಘಮಲು

ಅದೇ ನಿನ್ನಿರುವಿನ ಸುಳಿವು!

ಇರಲಿ ಹೀಗೆ ಅನುರಾಗದ ಹೊನಲು!

ಒಲವೇ,

ತಿಳಿದಿರುವವರು ಹೇಳುತ್ತಿರುವರು

ಮುಗಿಯದ ಹಾದಿಯಂತೆ ಈ ಬದುಕು

ಆದರೇನಂತೆ

ಕೊನೆಯ ತನಕ ಇರಲು

ನಿನ್ನೀ ಅನುರಾಗದ ಹೊನಲು!

ಬಾಲ್ಕನಿ!

ಬಾಲ್ಕನಿ ಸರಣಿ ಚಿತ್ರಗಳು..

ನೋವು-ನಲಿವು ಮತ್ತು ಒಲವು!

ಒಲವೇ,

ಯಾಕೀ ನೋವು ಈ ಪರಿತಾಪ

ನಿನಗಿಲ್ಲವೇಕೆ ಒಂದಿಷ್ಟು ಸಂತಾಪ!

ನನ್ನ ಪ್ರಲಾಪಕೆ ನಗುಮೊಗದುತ್ತರ..

“ನೋವಿನ ಅನುಭೂತಿ ಇರದ

ನಲಿವಿಗೆ ಕಾಸಿನ ಬೆಲೆಯಿಲ್ಲ;

ಗಾಯಗಳು ಸೋರದೇ ಕೀವಾಗದೇ

ನಿನ್ನೊಳಗಿನ ನನ್ನಿರುವು ಅರಿವಾಗುವುದೇ!”

ಬಿರುಕಿರದೆ ಸಾಗುವುದ್ಹೇಗೆ

ನನ್ನ ಬೆಳಕಿನ ರೇಖೆಗಳು ನಿನ್ನೊಳಗೆ!”

ಒಲವೇ,

ನೋವಿನ ಅನುಭೂತಿ ಇರದ

ನಲಿವಿಗೆ ಕಾಸಿನಷ್ಟು ಬೆಲೆಯಿಲ್ಲ;

ಗಾಯಗಳು ಸೋರದೇ ಕೀವಾಗದೇ

ನನ್ನೊಳಗಿನ ನಿನ್ನಿರುವು ಅರಿವಾಗುವುದೇ,

ಬಿರುಕಿರದೆ ಸಾಗುವುದ್ಹೇಗೆ

ಬೆಳಕಿನ ರೇಖೆಗಳು ನನ್ನೊಳಗೆ!

ಬೊಗಸೆ ತುಂಬ ಪಾರಿಜಾತ ಗಂಧ!

ಒಲವೇ,

ಹ್ಮ್, ನನಗೇನೂ ನೆನಪಾಗುತ್ತಿಲ್ಲವಲ್ಲ

ನನ್ನೊಲವೇ ಅದ್ಹೇಗೆ, ಅದ್ಯಾವಾಗ

ನನಗಿಷ್ಟು ನೀನಾದೆ ಸುಪರಿಚಿತ

ನೆನಪಿಸಿಕೊಳ್ಳಲು ಮನದಾಳಕೆ

ಇಳಿದ ಹಾಗೆ ಮತ್ತಿಷ್ಟು ಹತ್ತಿರ

ನಿನ್ನೀ ನಸುನಗೆ, ಬಿರುನಗೆ

ನಿನ್ನೀ ಪಿಸುನುಡಿ,  ಆಲಾಪ

ಯಾವೂದೂ ಅಪರಿಚಿತವಲ್ಲ

ಮತ್ಯಾವುದೋ ಜನುಮದ ಪಳೆಯುಳಿಕೆ

ಸುಮ್ಮನೇ ನಸು ನಗುತ್ತೇನೆ

ಬೊಗಸೆ ತುಂಬಾ ಪಾರಿಜಾತ ಗಂಧ!