ಒಲವೇ, ನೀ ಕಲಿಸಿದೆ ನನ್ನರಿವಿನ ಮಿತಿ..

ಒಲವೇ,

ನೀ ಹಚ್ಚಿದೆ ಹಣತೆ..
ಬೆಳಕು ಕಲಿಸಿತು ಒಲವು;

ಕಂಡೆ ನಿನ್ನ ಅಂದ..
ಚೆಲುವು ಕಲಿಸಿತು ಕಾವ್ಯ;

ಗೆಜ್ಜೆ ಕಟ್ಟಿದೆ ಕಾಲಿಗೆ
ಹೆಜ್ಜೆ ಕಲಿಸಿತು ಕುಣಿತ;

ನಿನ್ನ ನೋಟದಲಿ ಅರಸಿದೆ
ಅಮೂರ್ತತೆ ಕಲಿಸಿತು ಕಲೆ;

ಬೆಳೆದೆ ತ್ರಿವಿಕ್ರಮನಂತೆ ನನ್ನೊಳಗೆ
ನಾನೀಗ ಅರಿತೆ ನನ್ನರಿವಿನ ಮಿತಿ!


ನನ್ನ ಮಾತೃ ಭಾಷೆ ಕೊಂಕಣಿಯಲ್ಲಿ.. (ಮೊದಲ ಯತ್ನ)

ಮ್ಹೊಗ,

ಲಯಲೊ ತುವ್ಹೆ ದಿವ್ವೊ
ಉಜ್ವಾಡ ಮ್ಹೊಗು ದಿಸ್ಲೊ

ಚಂದಯಿ ಪಳಯಿಲೆ ತುಗೆಲೆ
ಬರಯಿಲೆ ಕಾವ್ಯ ಹಾಂವೆ

ಗೆಜ್ಜೆ ಬಂದ್ಲೆ ಪಾಯ್ಯಕ
ಶಬ್ದನ ಶಿಕಯಿಲೆ ನೃತ್ಯ

ಸೊದಿಲೆ ಸೃಷ್ಟಿ ಕಣಕಣಂತು
ಬುಡಯಿಲೆ ಕುಂಚ ರಂಗಂತು

ವಡಲೊ ತೂಂ ತ್ರಿವಿಕ್ರಮ ವರಿ
ಶಿಕಲಿ ಮಕ್ಕಾ ಗೊತನಾ ಕಸಲಿಂ

ಬಯಲುಗೊಂಡಿವೆ ಮಾತುಗಳು..

ಒಲವೇ,

ನನ್ನ ಮಾತುಗಳೆಲ್ಲ ಅಡಗಿತ್ತು
ಮೌನಗರ್ಭದ ಅಪ್ಪುಗೆಯಲಿ
ಒಂದೊಂದಾಗಿ ಬಯಲುಗೊಂಡಿವೆ
ನಿನ್ನಿಂದ ಸದ್ದಿಲ್ಲದೆ..

- ಪ್ರೇರಣೆ ರೂಮಿ

ಒಲವಿನ ಸಹಿ..

“ಕುಹೂ” ಕೋಗಿಲೆಯ ನಲ್ಮೆಯ ಕರೆಯಲಿ..

ನವಿಲುಗರಿಯ ಕಣ್ಣಿನ ಹಸಿರು ನೀಲಿ ಚೆಲುವಿನಲಿ..

“ಅಂಬಾ” ಕರೆಯ ವಾತ್ಸಲ್ಯದಲಿ..

ಮುಂಜಾವು-ಮುಸ್ಸಂಜೆಯ ಚಿತ್ತಾರದ ಮೋಹದಲಿ..

ಬಿದಿಗೆ ಚಂದಿರನ ಮಾದಕತೆಯಲಿ..

ಮುಂಗಾರು ವರ್ಷದ ನಾಟ್ಯದಲಿ..

ಶಿಶಿರನ ಬಿಗಿಯಪ್ಪುಗೆಯ ರೋಮಾಂಚನದಲಿ..

ವಸಂತ ಮತ್ತೇರಿಸುವ ಪುಷ್ಪ ಘಮದಲಿ..

ವೈಶಾಖದ ದಿನಕರ ಬಿರುನೋಟದಲಿ..

ಬೀಸುವ ಮರುತನ ಝೇಂಕಾರದಲಿ..

ಶರಧಿಯ ಶಂಖ ನಾದದ ಓಂಕಾರದಲಿ..

ಹಸುರು ಹುಲ್ಲಿನ ಮೇಲಿನ ತಣ್ಣಗಿನ ನಡಿಗೆಯಲಿ..

ಹಬ್ಬ-ಹರಿದಿನಗಳ ಆಚರಣೆಯ ಸಂಭ್ರಮದಲಿ..

ನೆಂಟ-ಮಿತ್ರರ ಒಡನಾಟದ ಸವಿಯಲಿ..

ಮಾಧವ, ನಿನ್ನಿರುವಿನ  ಅಂಕಿತ ಎಲ್ಲೆಲ್ಲೂ..

ಒಲವಿನ ಮುರಳಿಯ ನಿನಾದ ನನ್ನಲ್ಲೂ..