ಪುಟ್ಟಿ ಮತ್ತು ಚಂದಮಾಮನ ಹಲ್ಲು!

ಪುಟ್ಟಿ ಮತ್ತು ಚಂದಮಾಮನ ಹಲ್ಲು!
--------------------------------

ಚುಕ್ಕಿಗಳ ಜತೆ ಗೆರೆಗಳನೆಳೆದು
ಕುಂಟೆ ಬಿಲ್ಲೆಯನಾಡುತಿದ್ದ  ಚಂದಮಾಮ
ನುಣುಪಾದ ಚಿಕ್ಕ ಚುಕ್ಕಿಯೊಂದನೆಡವಿದನು
ಬಿದ್ದು ಹಲ್ಲು ಮುರಿದುಕೊಂಡನು;

ಚುಕ್ಕಿ ಚಂದಮಾಮಂದಿರ ದೊಂಡೆಗೆ
ನಿದ್ದೆಯಿಂದದೆಚ್ಚರವಾದ ಪಕ್ಕಿಗಳೆಲ್ಲ ನಕ್ಕ
ಕಿಲ ಕಿಲ ಸದ್ದು ಮುಗಿಲ ತುಂಬಾ
ಮಾರ್ದನಿಸಿ ನನ್ನ ಪುಟ್ಟಿಯನೆಬ್ಬಿಸಿತು;

ಅಂಗಣಕೆ ಬಂದು ಮುಗಿಲತ್ತ
ಚಾಚಿದ ಪುಟ್ಟಿಯ ಪುಟ್ಟ ಗುಲಾಬಿ ಕೈ
ಮುಷ್ಟಿಯಲಿ ಚಂದಮಾಮನ ಹಲ್ಲಿನ
ತುಂಡು ಭದ್ರವಾಗಿ ಅಡಗಿತು;

ನಾಳೆ ಪುಟ್ಟಿ ತನ್ನ ಪುಟ್ಟ
ಗೆಳೆಯ ಗೆಳತಿಯರಿಗೆ ಹೇಳುವ
ನಲ್ಲಿರುಳಿನ ಕತೆಗೆ ಸಾಕ್ಷಿಯಾಯಿತು!


(ಹದಿನೆಂಟು ವರ್ಷಗಳ ಹಿಂದಿನ ದಿನದ ನಲ್ಲಿರುಳ ನೆನಪಿನಲಿ ಮೂಡಿದ ಬರಹ.. )