ಹಲವು ಹಂಬಲಗಳ ತರುವ ಶಶಿಯ ತೋರುವ ಮುಸ್ಸಂಜೆ!

ಹಲವು ಹಂಬಲಗಳ ತರುವ ಶಶಿಯ ತೋರುವ ಮುಸ್ಸಂಜೆ!
___________________________________

ತಲೆಯೆತ್ತದೆ ನಡೆದವಳ ಕೆಣಕಿ ಪ್ರಶ್ನಿಸಿದ...
"ಅದೇನೆ ಇಂದು ಬರೆಯಲು ಸ್ಫೂರ್ತಿ ಬೇಡವೆ! ಇಂದೇಕೆ ನೋಟವಿಲ್ಲವಿತ್ತ?"
"ನನ್ನಲ್ಲಿ ಹುಟ್ಟಿಸುವೆ ನೀ ಹಲವು ಹಂಬಲಗಳನು..
ನಿನ್ನ ತೋರುತಾ ರಾಮನಿಗೆ ಉಣಿಸುವ ಕೌಸಲ್ಯೆಯಾಗುವಾಸೆ,
ಬೆಳದಿಂಗಳಲ್ಲಿ ರಾಧೆಯಾಗಿ ಕೃಷ್ಣನೊಡನೆ ಯಮುನಾತೀರದಲಿ ಕೋಲಾಟವಾಡುವಾಸೆ,
ಕೈಲಾಸಗಿರಿಯಲಿ ಶೈಲಜೆಯಾಗಿ ಪರಮೇಶನ ಸೇವೆಮಾಡುವಾಸೆ,
ಹಕ್ಕಿಯಾಗಿ ಹಾರಿ ನಿನ್ನೂರಿಗೆ ಬರುವಾಸೆ,
ನಿನ್ನ ಮೋಹಕ ಬೆಳಕನ್ನು ಪುಟ್ಟ ಕ್ಯಾನ್ವಾಸಿನಲ್ಲಿ ಬಂಧಿಸುವಾಸೆ,
ಮಿಂಚುವ ಚುಕ್ಕಿಯಾಗಿ ಆಗಸದಲಿ ಮೆರೆಯಬೇಕೆಂಬಾಸೆ... "
ಹಂಬಲಗಳ ಪಟ್ಟಿಯನ್ನು ಕೇಳುತ ಸೋತ ಚಂದಿರ!
ಅವನಿಗೆ ಪಟ್ಟಿಯ ಕೊಡುತ ನಾನೂ ಸೋತ ಮುಸ್ಸಂಜೆ!