ನಾನು ಕಂಡ, ಕಾಣುವ ಮುಸ್ಸಂಜೆಗಳು!

ಬಣ್ಣದ ಓಕುಳಿ ಚೆಲ್ಲಿ 
ಮುಗುಳ್ನಗುತ್ತಲೇ ತೆರೆಮರೆಗೆ 
ಸರಿಯುತ್ತಿರುವ ರವಿಯ 
ಬೀಳ್ಕೊಟ್ಟ 
ಹೊಸ ವರುಷದ 
ಮೊದಲ ಮುಸ್ಸಂಜೆ!
-01-01-2013

  ************

ಶಿರದಿ ನವಿಲ ಗರಿಯ ಧರಿಸಿ
"ಗಿಲ್" "ಗಿಲ್" ಗೆಜ್ಜೆ ನಿನಾದದೊಂದಿಗೆ 
ಮುರಳಿಯ ಗಾನವನ್ನು ಮೇಳೈಸುತ್ತಾ
ಗೋಧೂಳಿಯ ನಡುವೆ ತನ್ನ ಗೆಳೆಯ 
ಗೋವಳರೊಡಗೂಡಿ ಬರುತ್ತಿರುವ 
ಗೋಪಾಲನಿಗಾಗಿ ಹೊಸ್ತಿಲ ಬಳಿ 
ಕಾದ ಯಶೋಧೆಯು ನಾನಾದಂತೆ 
ಕನಸ ತಂದ ಮುಸ್ಸಂಜೆಯಿದು!
-03-01-2013

******************



ನನ್ನೆಲ್ಲ ಮನದ ಮಾತುಗಳ ಆಲಿಸಲೆಂದೇ
ನೀಲಾಗಸದಲ್ಲಿ ಹರಡಿರುವ ಬೆಳ್ಳಿಚುಕ್ಕಿಗಳ 
ತೋರುವ ಮುಸ್ಸಂಜೆಗೆ ಸುಸ್ವಾಗತ!

- 04-01-2013

****************************


ಹೊಸ್ತಿಲ ಬಳಿ ನಿಂತು 
ನಲ್ಲನ ನೆನಪುಗಳಲ್ಲಿ
ಕಳೆದು ಹೋದವಳಿಗೆ
ಸೊಳ್ಳೆ ಕಚ್ಚಿದಾಗ
ದುರ್ವಾಸ ಮುನಿಗಳ
ನೆನಪು ತಂದ
ಈ ಮುಸ್ಸಂಜೆ!

ಶಕುಂತಲೆ ದುಶ್ಯಂತನ ನೆನಪಿನಲ್ಲಿ ಕಳೆದುಹೋದದುರಿಂದ ತಾನೆ ದುರ್ವಾಸರ ಶಾಪ ಪಡೆದಳು! ಇಲ್ಲಿ  ಈ ನಲ್ಲೆ ಶಾಪದ ರೂಪದಲ್ಲಿ ಮಲೇರಿಯಾ ಪಡೆಯುವಳೇನೋ..:-)
೦೮-೦೧-೨೦೧೩